Ayera mainta, Minister di Enseñansa, Ciencia y Desaroyo Sostenibel Armando ‘Rudy’ Lampe a ofrece un conferencia di prensa na medionan local, den cual el a papia tocante e comienso di aña escolar e siman aki. Tambe el a duna su opinion tocante un articulo di SEPPA den cual a manifesta e intrankilidad cu e maestronan tin cu traspaso di Traimerdia pa Ministerio di Asuntonan Social, cu te ainda nan ta sigura cu nada a wordo haci.

Lampe a comenta cu, for di fin di siman pasa, e maestronan ta haciendo trabounan necesario na e diferente scolnan pa asina por ricibi e alumnonan. Tambe el a destaca cu ‘hopi hende no sa cu nos maestronan, di nan mesun cartera, ta cumpra materialnan pa studiantenan y tambe tin biaha cu nan ta yuda pa e muchanan di menos recurso por haya un desayuno of algo pa come’.

“Aruba ta limita pa loke ta e parti financiero y hopi biaha nos no por duna nan y ofrece nan e condicion optimal pa nan por funciona”, el a manifesta.

Di mesun manera, Lampe a informa cu aña escolar nobo lo cuminsa cu scolnan cu no tin airco, pa motibo cu, segun Lampe, nan no a logra ainda pa tur scol por tin esaki na Aruba; specialmente mirando cu den dianan aki y pa luna di september, e temperatura ta aumenta hopi. El a pidi comprension pa e maestronan cu, a pesar di e condicionnan adverso, ta sigui traha pa e muchanan. Asina mes el a desea tur exito den aña escolar nobo aki.

Lampe tambe a comenta cu no tur scol lo cuminsa duna les diahuebs proximo. Esaki pa motibo cu den vakantie masha hopi trabou a ser haci simultaneamente na diferente scol, pasobra no tur cos ta den nan man. Ta existi algun factor cu a pone cu na diferente scol nan ta trahando hasta den fin di siman, por ehempel Beatrix School na Dakota.

Den e caso cu e scol aki no por cuminsa diahuebs proximo, e Minister a expresa cu nan lo tuma contacto cu e mayornan. Ademas nan ta ocupa cu Scol Dornasol na Burubundo, cu na e momentonan aki nan ta haciendo tur e reparacion, pero tur e trabou ainda no ta cla. Ademas Scol Fontein na San Nicolas, cu ta den mesun situacion, e cabesante lo avisa e fecha cu les lo cuminsa despues.

Tocante Scol Practico pa Ofishi Santa Cruz (SPO), Lampe a bisa cu na e momentonan aki apenas ta bezig pa move diferente di e trailernan cu no por ser uza mas, pa via cu varios mucha a bira malo. El a sigura cu Gobierno a yega na un acuerdo pa retira e trailernan y nan ta prepara localnan nobo pa cuminsa e aña escolar.

Di loke ta trata un publicacion di e dia di ayera den e medio aki, den cual maestronan di SEPPA a expresa nan preocupacion tocante e traspaso di Traimerdia pa Ministerio di Asuntonan Social, Lampe a splica cu su persona mes a pidi den Conseho di Minister pa e traspaso di tur loke ta opvang, voorschoolse y naschoolse cay abou di Ministerio di Asuntonan Social, pa motibo cu nan no ta duna les y nan no ta cay bou di curriculum, Inspectie, ni Directie Onderweijs.

Tambe Lampe a expresa cu el a propone e traspaso, pero na e mesun momento el a splica cu esey ta bay cu fase, pa motibo cu ta un proceso largo cu no por bay di un dia pa otro. E conseho a drenta for di Directie Wetgeving, cu a bisa tres cos importante. E prome ta cu Lampe tin rason, cu e opvang en cuestion no ta pertenece na e area educativo y cu ta pertenece mas pa area social y cu Directie Wetgeving a confirma e vision ey. Di dos punto importante cu nan ta bisa ta cu nan tin un LIM (Landsverordening Instelling Ministeries) y cu esey ta autoridad cu cada Minister tin riba diferente departamentonan.

Den e caso aki, tambe nan ta bisa cu tin cu cambia e ley, pasobra na e momentonan aki ta Lampe ta esun cu ta autorisa pa firma. Di tres luga, e presupuesto di 2019 ta cay ainda bou Ministerio di Enseñansa te cu dia 31 di december proximo, y pa januari di otro aña e presupuesto di Traimerdia ta bay cay bou di Ministerio di Asuntonan Social.

Tambe el a sigura cu nan a laga haci un investigacion y e reporte cu Lampe a haya ta indica cu, loke a bay fout, e no ta bay sigui cune. El a bisa cu e tin cu coregi locual a bay fout y ta existi maestronan cu pa añanan largo a ricibi 25% pago di mas sin consideracion. “Nos tin cu bay coregi cierto fout, e intrankilidad tin di haber cu esey mas tanto. Placa di pueblo ta sagrado”, Lampe a sigura.