Armando Lampe, minister di Enseñansa, Ciencia y Desaroyo Sostenibel ayera a publica riba su rednan social cu diabierna ultimo a trata den parlamento e ley pa aumenta e castigo pa esunnan cu ta abusa di muchanan.
Durante e reunion publico aki, el a menciona cu el a haci un presentacion di e programa cu ministerio ta implementando den scolnan publico. Ademas, el a sigura cu “e miho manera pa combati abuso di mucha ta empodera e mesun muchanan” y ta exactamente esey ta e metodo di prevencion cu ta wordo implementa for di aña 2018.
“Abuso di mucha ta un problema sumamente grandi, den nos comunidad y tambe na nivel mundial”, el a bisa. Tambe a señala cu e metodo aki nan lo kier implementa na tur scol di manera obligatorio, cu aworaki ta di manera di un proyecto piloto na vierde klas, y cu tambe a keda conoci mediante charlanan cu a wordo duna na diferente MFA di e barionan. Pa motibo cu tin cu educa e mayornan tambe den e henter comunidad pa por para pa e derecho di e muchanan.
Pa loke ta trata e marcha di dia 3 juli y tur e discusionnan cu a surgi den dianan aki, minister Lampe a comenta cu el a keda impresiona pa e iniciativanan di e ciudadanonan, pa motibo cu ‘esey ta e caminda, cuminsa papia di e tema aki’, el a finalisa.
