Ayera mainta, minister di Enseñansa, Ciencia y Desaroyo Sostenibel, Armando Rudy Lampe a ofrece un conferencia di prensa pa duna di conoce cu Departamento di Enseñansa y Bureau Leerplicht lo controla scolnan pa cumpli cu tratado internacional di mucha riba educacion. Ademas a informa cu zwemles lo cuminsa cu un programa nobo pa muchanan den kleuterschool.

Den su relato, Lampe a bisa cu den fin di siman a keda conoci cu tin diferente scol cu ta enfrentando e pandemia. Aki algun docentenan a test positivo pa Covid-19 y por lo tanto scolnan ey mester keda cera, pa loke ‘nos mester adapta nos mes na e normalidad nobo aki’.

Ademas el a menciona cu ora un mucha ta inscribi na un scol, e scol ta responsabel pa su educacion. Mirando esaki loke el a pidi cooperacion di tur cabesante di scol pa na momento cu un mayor pidi pa un mucha keda cas, pa no duna e mayor e contesta: “si e mucha no ta bin scol, e ta perde e aña.” Lampe a specifica cu e contesta ey ta un violacion di e tratado internacional di mucha.

Tocante esaki, el a comenta cu a duna instruccion na Departamento di Enseñansa hunto cu Bureau Leerplicht, cu lo haya e tarea pa controla cu scol ta cumpli cu tratado internacional di mucha riba educacion, cu pa motibonan valido e mayor ta tene nan yiu na cas.

Les di landamento

Lampe tambe a reacciona na un noticia polemico cu a circula den dianan aki den comunidad. Esaki ta referi na un comentario di un parlamentario, kende a expresa cu tabatin rumor cu lo stop cu les di landamento na scol. Lampe a splica cu no ta berdad cu esun cu ta duna e lesnan aki ta bay perde nan trabou. Tampoco ta berdad cu landamento escolar lo no existi mas. El a informa cu nan ta bay trece cierto cambionan, na unda cu despues di mas di 27 aña, e programa di landamento escolar a wordo efectua sin ningun cambio.

Lampe a bisa cu nan a ricibi consehonan di expertonan internacional pa loke ta e desaroyo cu tin riba e tema aki, na unda nan a haya cu “ora mas lihe bo cuminsa siña landamento, miho bo por cumpli cu bo meta.” Esaki mirando cu e meta di landamento escolar ta pa proteha bida di e muchanan. Aruba ta rondona di lama y efectivamente un programa asina aki mester yuda pa ni un mucha mas hoga, sea den pool of den lama. Y e tendencia internacional ta pa cuminsa mas lihe posibel.

Pa e motibo aki, Lampe a expresa cu nan ta bay haci e programa aki no solamente pa muchanan den derde klas mas, ora e mucha tin nuebe aña. El a anuncia cu nan ta bay hala e programa y pone den kleuterschool, pa asina muchanan di cuater y cinco aña por cuminsa cune.

Expertonan a conseha pa haci e programa cu lesnan den pool mes y no na lama, pa motibo di siguridad y bou di hopi guia, pa asina e mucha ta bon proteha.

Ademas, Lampe a comunica cu instructor di les di landamento ta bay dedica na muchanan cu pa via di pandemia Covid-19 no a logra ainda termina e programa. Nan tin tempo te cu december pa termina esaki, y for di januari e programa lo cuminsa den scolnan preparatorio.

Di loke ta trata instructornan, Lampe a splica cu pa 27 aña cu e programa aki tin, nan no por continua cu e contractnan ‘as usual’. Sino cu lo cuminsa un sistema nobo, na unda gobierno lo cumpra e servicio di e instructornan aki cu kier sigui cu e programa nobo.

Tocante esaki, Sindicato di Maestro SIMAR durante un conferencia di prensa – prome cu esun cu minister Lampe a ofrece – hunto instructornan di landamento escolar a trece dilanti cu nan kier claridad riba kico lo pasa cu nan, cu tin casi 28 aña dunando su curason pa esaki y cu nan no tin vaste dienst.

Durante un reunion cu nan a atende siman pasa, nan a wordo informa cu landamento escolar lo caba dia 31 di december di aña aki, pa motibo cu e no ta cay den curriculum. Josephine Albertus presidente di sindicato a comenta cu “esaki ta hopi lamentabel, mester bin cu claridad, nan kier algo concreto”.