Dialuna ultimo, minister di Enseñansa, Ciencia y Desaroyo Sostenibel, Armando ‘Rudy’ Lampe a ofrece un conferencia di prensa pa trece dilanti cu mañan scol lo cuminsa cu diferente scenario, cu ta depende di directivanan di scol. Ademas a destaca cu si mayornan dicidi di no manda nan yiu scol sino ricibi les digital, e mucha ta keda inscribi na scol igualmente.

Manera a wordo anuncia, mañan dia 3 di september scolnan lo habri y ta keda na cada directiva di scol pa determina bao di ki circunstancianan lo bay habri scol. Tin e flexibilidad pa motibo cu nan ta conoce miho e condicionnan y e scol, pa asina por garantisa cu ta cumpli cu protocol di DVG y reglanan stipula pa protege e salud di tur studiante y docentenan.

Lampe a splica cu e ta hayando hopi pregunta di mayornan y cu ta compronde e preocupacion cu ta existi. Tin mayornan cu a dicidi di no manda nan yiu na scol mirando e problematica di contagio di Covid-19 cu tin na Aruba.

Pa cu esaki, Lampe a sigura cu “esaki no ta problema” pa motibo cu e ley di enseñansa obligatorio ta referi na e hecho cu pa e mucha “ta nos tin e obligacion pa dun’e enseñansa. Y e derecho riba educacion no necesariamente ta keda ehecuta den edificio di scol.” Pa es motibo el a trece esaki dilanti pa trankilisa e comunidad.

“Si mayornan dicidi cu nan yiu ta mas sigur na cas, nan tin derecho di por haci esaki trankilamente”, minister Lampe a anuncia.

E condicion di esaki ta cu e mucha cu ta keda cas mester haya educacion. Lampe a menciona cu algun mayor ya caba tin e contactonan pa ‘homeschooling’, cu tin diferente oferta rond di mundo. Ademas el a sigura cu e mucha ta keda inscribi na scol a pesar cu e mayornan a zorg pa e haya homeschooling na cas.

Si e circunstancianan cambia den futuro, cu situacion di Covid-19 normalisa, e ora ey e mayor ta sigura cu e mucha ta inscribi na scol.

Tambe el a bisa cu maestronan di IPA ta preparando pa nan por ta miho capacita pa ofrece enseñansa digital, y cu maestronan y cabesante lo mester percura pa e les yega na e mucha via diferente plataforma online, den caso cu mayornan lo dicidi di no hiba nan yiu scol.

Tocante cuanto ta e cantidad di mucha cu lo ricibi lesnan digital for di cas, Lampe a expresa cu mañan 3 di september nan lo haya sa cuanto mucha lo cuminsa haya les online cu un miho bista.

Di otro banda, durante un sesion informativo cu Sindicato di Maestronan di Aruba (SIMAR) a ofrece, su presidente Josephine Albertus a trece dilanti cu algun scol no tin e condicion di un infrastructura adecua na 100% pa cuminsa mañan. El a menciona por ehemplo cu algun lokaalnan no tabatin suficiente ventilacion y cu bentananan no por habri. Ademas di esaki cu algun scol no tin disponibilidad pa muchanan por laba nan man manera protocolnan di bio-siguridad na nivel mundial ta indica.

Pa cu esaki, Bon Dia Aruba a puntra Lampe si su persona ta al tanto di e situacion aki, pa loke el a contesta cu e tin lunanan den deliberacion, bisando cu di punto di bista di ventilacion y higiena, mester busca alternativa pa cierto edificionan cu nan ta huur. Pero asina mes el a sigura cu “team di scol mes y directiva mes cu tabatin otro opinion cu mi persona a insisti pa sigui huur e edificionan aki”.

Ademas, el a señala cu e ekipo di maestronan mester bin cu solucionnan practico pa loke ta trata ventilacion y e muchanan por sali cada cierto tempo di e lokaalnan y no keda cera cu airco pa hopi tempo. “E no ta sano”, minister Lampe a sigura.

Di mesun manera, siman pasa tambe un scol a wordo informa cu nan tin tres escenario pa habrimento di scol. Un ta trata di 100% cu tur mucha na scol; 50% cu lesnan online dos dia pa siman na scol; of tur lesnan online y muchanan no ta bay scol mes. Tocante esaki Lampe a anuncia cu e scol ta dicidi esaki. Por ehemplo, un scol na San Nicolas dicidi di habri 100% cu alumnonan na scol pa wak con esey ta bay, tin otro scol secundario ta bay ofrece 50% fisicamente na scol y enseñansa na cas pa evita tin hopi aglomeracion na tereno di scol.

“Cada scol tin su modalidadnan y nos ta kere cu esey ta un miho forma compara pa bin cu un sistema general, pasobra no ta tur scol tin e mesun condicion”, Lampe a comenta.