Den su programa semanal, minister di Enseñansa, Ciencia y Desaroyo Sostenibel Armando Rudy Lampe a papia tocante varios topico, un di nan tin di haber pa duna reconocemento na dos persona den comunidad di San Nicolas, e conferencia di economia circular cu a tuma luga siman pasa y testimonio di mayornan pa loke ta trata enseñansa online.
Manera a keda conoci, siman pasa Aruba a organisa un conferencia di economia circular na unda tambe a organisa un tayer diamars ultimo na Biblioteca Nacional cu e participacion di diferente funcionario publico y expertonan den economia circular.
Di e encuentro internacional aki, minister Lampe a expresa cu economia circular ta keda como un tema di suma importancia na unda mester haci e cambio di economia liniaal pa economia circular y con por stimula iniciativanan economico pa haci uso di nos mesun recursonan cu den temporada aki di crisis aki, iniciativanan di e sorto aki ta importante.
Asina mes, el a señala cu den conferencia tabatin un doño di restaurant cu den tempo di crisis di Covid-19 loke el a mira ta cu el a wordo obliga pa baha su gastonan y door di esey e por tabatin su ganashi den e ora cu por aplica e pensamento di economia circular, tin basta forma di aplica esaki den negoshi en bes di tira desperdicio afo y el a mirel’e como un oportunidad pa haci otro uso cune.
“Esey ta na beneficio di cualkier negoshi”, minister Lampe a sigura.
Pa e motibo aki, expertonan a reuni cu doñonan di restaurant y cu diferente representantenan di sector priva tambe pa mustra con e pensamento aki por yuda pa aumenta e ganashi di empresanan cu por a tin un otro perspectiva pa loke ta trata e desperdicionan den henter proceso circular en bes di tira liniaal y tira afo.
Cambio di nomber pa dos caya na San Nicolas
Asina mes, el a destaca cu e dianan aki su persona como minister di Educacion a haci un evento pa duna reconocemento pa dos persona cu a duna nan contribucion pa Aruba y cu tabatin e pensamento di un desaroyo integral y cu no tabata tolera inhusticia social, e prome evento aki a tuma luga siman pasa na unda a cambia di nomber un caya na San Nicolas pa honra sr. Ben Statie.
E otro cambio di nomber di caya lo wordo celebra mañan diamars na Colony, e caya na e momentonan aki ta yama First Avenue y lo bira Henry Coffi Avenue den reconocemento pa e prome gerente local di e refineria Lago, den mundo aki e persona tabata un personalidad special y den comunidad tabata un persona hopi activo den diferente fundacionnan, segun loke minister Lampe a splica.
Minister a duna un gradicimento pa personanan den comunidad cu a firma y a pidi pa honra e dos persona aki, “San Nicolas ta bay conoce e ora ey dos caya cu e nomber di ilustre yiunan di eynan cu a duna contribucion na desaroyo di nos pais”, minister a afirma.
Testimonio di mayornan pa ensenansa online
Di otro banda, minister Lampe a trece dilanti e testimonio di algun mayornan cu e cual nan yiunan ta den sistema nobo di educacion online, manera el a declara, door di crisis Covid-19 educacion online a haya un enorme crecemento den mundo y cu aworaki ya caba tin e universidad global “Universy of the People” cu e cual asina leu e revolucion den educacion den enseñansa ta cu e universidad aki ta completamente acredita unda studiantenan por haci nan estudio universitario y ta termina nan grado academico sin tin un debe.
“Aworaki e era digital ta haci posibel cu desde cualkier luga lo por inscribi na universidad aki y haya un grado academico casi gratuitamente”, minister Lampe a bisa.
Den un encuentro cu el a haya cu Universidad di Aruba, minister Lampe a comenta cu el a cuminsa prepara e personanan pa cu e cambionan aki cu ta biniendo, na unda studiantenan no solamente tin e opcion di inscribi na Universidad di Aruba sino cu tambe tin e opcion di inscribi na un universidad di Merca como “University of People”.
“Esaki ta bay implica hopi cambio den mundo di enseñansa y nos tin cu prepara nos muchanan y nos hobennan pa e mundo ey”, minister Lampe a señala.
Pa e motibo aki, el a haya interesante algun testimonio di mayornan cu nan yiu ta den un scol online, el a sigura cu mayornan ta bisel’e cu ta hopi interesante pa mira ki impacto positivo esey tin den desaroyo di un mucha hoben.
“Akinan ya e mucha ta crece independiente, ta actua ya caba independiente y e mes ta haci su escogencianan”, esey ta e herment di e habilidad cu hobennan y muchanan ta bay tin mester den mundo di futuro, minister Lampe a menciona.
Ta p’esey e reformanan cu tin den sistema di enseñansa segun loke minister Lampe a afirma, pa stimula loke ta e autonomia y independencia di e mucha pa e por studia y cu ta balornan cu siglo 21 ta bay pidi, minister Lampe a finalisa.
