Durante un conferencia di prensa diahuebs pasa, Minister di Enseñansa, Ciencia y Desaroyo Sostenibel Armando Lampe, a duna di conoce cu su ministerio ta ampliando diferente di e servicionan educativo y el a nombra algun di e dependencia di Colegio San Nicolas, cu pa via di e maneho nobo, e cifra di muchanan pa HAVO a aumenta.
Lampe a informa cu nan a amplia e scol aki pa haci un dependencia nobo, asina tambe scol Dornasol, cu ta pa muchanan cu necesidad special.
Di mesun manera, Lampe a splica cu ora un mucha ta cumpli cuater aña e tin derecho riba enseñansa y esunnan cu lo cumpli e edad ey prome cu dia 31 di december por drenta na kleuterschool preparatorio. Desde cu el a haci e anuncio ey, e cantidad di muchanan pa scol preparatorio a aumenta y nan a cuminsa amplia e capacidad na varios scol, asina tambe cu mas personal y material.
Tambe el a señala cu nan mester amplia loke ta e servicio educativo y el a splica cu nan a coregi loke tabata robes, y p’esey nan a haci denuncia na Landsrecherche di iregularidad cu a sosode na EPB, mescos cu a surgi tambe na Enseñansa pa Empleo, cu tabatin iregularidad financiero.
Lampe a comenta cu nan a bin cu un trayecto nobo cu mas ‘Training on the job’, un sistema cu e docentenan lo bay ta mas practico den scol di ofishi y segun minister a expresa, nan a papia cu studiantenan cu a bisa cu nan ta entusiasma cu e rumbo nobo. “Esey ta un cambio den nos sistema tradicional di enseñansa”, Lampe a sigura.
Ademas, Lampe a informa cu lo bay instala ‘digiborchinan’, borchinan digital na scolnan publico pa loke ta trata e sistema di digitalisacion. Asina mes, cu lo bin training pa e maestronan pa motibo cu e mes a referi cu e sistema di duna les manera antes, rond di mundo ta cambiando y mester di un educacion mas personalisa.
