Diabierna mainta, Minister di Enseñansa y Deporte, Endy Croes a haci un bishita oficial na Colegio EPI. Colegio EPI ta prepara nos hobennan pa drenta mercado laboral.
Actualmente, EPI ta conta cu 1644 studiante. Na yegada directora Sra. Ankie Danker y staf di Colegio EPI a duna mandatario di Enseñansa y Deporte un caluroso bonbini na e scol.
Croes a ricibi un presentacion amplio di unda EPI ta na e momento aki y unda nan kier bay cu e scol. Directora Sra. Ankie Danker a presenta e vision y dialoga riba algun inkietud, entre otro, cierto mantencion y cu a tuma contacto cu DOW. Croes a comparti un momento ameno cu e “unit mangers” di Colegio EPI y cera conoci cu e staf y docentenan di e scol. Despues, Croes a haya un recorido di e scol unda a bishita e sector di Ciencia y Tecnologia, Economia, Salubridad y Servicio y Hospitalidad y Turismo. E mandatario a presencia con e alumnonan ta ricibi les y practica.
Minister Endy Croes a enfatisa cu ta di vital importancia pa estrecha e comunicacion entre Ministerio di Enseñansa, staf, “unit manager” y docentenan di EPI. Hunto nos tin cu traha pa logra e bienestar di e alumno. Tambe, nos tin cu analisa e necesidad di e mercado laboral, pa asina ahusta e estudionan. Na e momento aki EPI ta ofrece diescinco (15) estudio na e necesidad di e mercado laboral.
Pa conclui, Croes a indica cu EPI ta riba un bon caminda. E ta gradici e directora, staf, docente- y alumnonan pa e caluroso recepcion. Alabes ta desea e docente- y alumnonan un exitoso aña escolar 2023 – 2024. Conta cu sosten di Gabinete Wever-Croes II pa hunto nos saca e scol aki padilanti.
