Minister di Energia, Labor y Integracion Glenbert Croes tocante interupcion di coriente: “Ta mi deber pone un presion pa haya un solucion lo mas antes posibel”

Un plan di accion di 30 dia a ser instrui na ELMAR N.V, WEB Aruba N.V y Utilities Aruba N.V dia 4 di september ultimo pa nan logra drecha e situacion pa loke ta trata interupcion di coriente den varios bario na Aruba, di esaki minister encarga cu Energia, Glenbert Croes a sigura cu nan tin te 4 di october pa produci e resultado di e deadline cu minister Croes a pone pa nan.

“E deadline cu ma pone pa nan no ta pa menasa ni un hende, e deadline ta pa nan soluciona e problema pa nos pueblo, no por ta asina cu den un mundo cu mas calor cu nos ta biba, cu den dado momento comunidad y economia ta depende di coriente anto coriente ta bay, e molester ta grandi y nos ta kere cu den mundo avansa mirando e nivelnan di inversion cu nos ta haciendo na ELMAR y na WEB, nos debe nos pueblo un suministro di coriente y awa confiabel,” minister Croes a bisa.

Pa e motibo aki e mandatario a expresa cu e ta spera cu ansha pa e resultado di dia 4 di october “NV di gobierno y den caso aki ta conta pa tur, ora bo tin un N.V di pueblo, bo mester duna pueblo cuenta, no solamente pa problemanan cu ta surgi sino con bo ta solucion’e y como minister responsabel ta mi deber pone un presion pa haya un solucion lo mas antes posibel,” el a sigura.

Interupcion di coriente ta un situacion fastioso cu henter comunidad di Aruba a bin enfrentando den ultimo luna, pa esaki durante conferencia di prensa di Gobierno di dia 4 di september ultimo, minister Croes a elabora riba e situacion actual cu tin, cu constantemente coriente ta bay den diferente barionan y mirando cu e situacion aki ta uno inaceptabel pa Gobierno, a pidi Utilites pa liderisa e proceso encaminando cu e companianan WEB, ELMAR un plan di accion den e proximo 30 dianan.

Minister Croes a indica cu comunidad di Aruba ta pagando un prijs considerabel pa awa y coriente y corectamente ta espera di por tin un calidad di suministro optimal. E suministro di coriente mester ta confiabel y stabiel, specialmente den e temponan aki cu ta hopi calor.

“Mester traha cu un maneho cu ta premira unda inversionnan mester wordo haci pa distribucion y suministro di coriente permanece stabiel tur caminda na Aruba. Calentamento global ta un fenomeno conoci y como pais nos mester ta prepara pa por confronta y enfrenta tur e retonan cu esaki ta trece cune,” e mandatario a splica.

Record nobo di peak di carga di coriente debi na cambio di clima
Mediante un comunicado di prensa, ELMAR N.V a destaca cu riba 13 di september, ELMAR a presencia un record peak di carga (load) di coriente di 144.5 megawatt, y riba 14 di september, nos a presencia un otro peak remarcabel di 146.4 megawatt. E record aki a wordo kibra un bes mas riba 15 di september, ora e peak a yega un record nobo di 151.1 megawatt.

Ademas, a informa cu e averahe den demanda di electricidad na Aruba ta 98.3 MW, pero manera tur aña, e luna di september ta e luna di mas calor di aña unda nos ta presencia e peak di carga. Aña pasa, e peak di carga (load) di coriente di aña tabata 137.6 megawatt. Na 2021 e peak di aña tabata 128.1 megawatt y na 2020 e peak di aña tabata 121.9 megawatt.

E peaknan consecutivo den demanda di electricidad durante e ultimo añanan durante september ta un señal cla di e retonan creciente cu nan ta enfrenta debi na cambio di clima y e temperaturanan cu ta subi constantemente.

E efectonan di cambio di clima ta indudabel y como isla, ta presencia e cambionan aki na prome fila. E temperaturanan creciente no solamente ta afecta e bida diario, sino tambe ta pone un stress significante riba infrastructura di energia. E aumento rapido di consumo di coriente durante un heat wave tin su impacto riba e red di distribucion.

“Nos ta experiencia e efectonan di cambio di clima continuamente, e ta crucial pa nos tur traha hunto pa reduci nos ‘carbon footprint’ na mundo y sigura un futuro sostenibel pa nos tur na mundo. Mientras ELMAR ta mantene su compromiso pa ofrece electricidad accesibel na e habitantenan di Aruba, nos kier stimula nos clientenan pa ta mas consciente di nan consumo di coriente. Cada esfuerso pa reduci consumo di coriente, manera paga luz ora nan no ta den uso, isolacion adecua di casnan, y uso di aparatonan eficiente di energia, por haci un diferencia.”

Sinembargo durante luna di september hasta ayera 26 di september, ELMAR riba su Facebook page a reporta mas di dies interupcion di coriente, pa diferente motibo, entre otro, problema den distribucion di coriente, contratista cu a causa daño debi na un trabou no relata na ELMAR, corto circuito door di humedad y tambe nan a haci trabounan di mantencion di liñanan di tension halto.