Dialuna mainta, durante e conferencia di prensa di Gobierno di Aruba, Minister di Energia Glenbert Croes a elabora riba loke Aruba ta haciendo den cuadro di e ekiponan cu ta den bon condicion na e zona di e refineria.
Minister Croes a splica cu durante su bishita na Ecuador su persona conhuntamente cu sr. Edison Briesen a reuni cu Petroecuador riba e tema pa reactiva e ekiponan den zona di refineria cu ta den bon condicion, a base di technologia y combustibel limpi, gas y no a base di HFO. Pa loke ta trata e ekiponan den mal condicion, Minister Croes a indica cu nan lo wordo reemplasa.
Minister Croes tambe a informa cu gobierno ta trahando actualmente riba e facilidadnan pa LNG y e trabounan ta bayendo hopi bon. Gobierno tambe ta den e proceso pa reactiva e parti di tanki, Terminal di Energia di Aruba (TDEA) y e partinan bon di refineria pa nan wordo reactiva a base di energia limpi y tecnologia moderno.
Fuel Marketing Supply Aruba (FMSA) ta invirtiendo den mehora su infrastructura pa Aruba por “off load” gasolin, diesel, jetfuel y HFO. Bou di ningun circunstancia gobierno lo permiti pa pone na riesgo e siguridad den “energy supply” pa nos economia. Refineria Di Aruba (RDA) a traves di su board, su gerencia y riba recomendacion di gobierno di Aruba a urgi pa haci tur cos posibel pa sigura e integridad y confiansa den infrastructura energetico na RDA.
“Ohala tur e placa cu CITGO a pone pa e refineria tempo nan a bin, por a wordo inverti den e infrastructura di nos refineria. Lastimamente el a wordo malgasta creando un situacion dificil pa e companianan estatal di gobierno. E ta mi meta pa yega na un resultado positivo pa loke ta e reactivacion di e ekiponan den bon condicion den e zona di e refineria.” Minister Croes a expresa.
Minister Croes a indica cu na Februari, su persona conhuntamente cu Utilities Aruba NV y RDA lo biaha pa Hulanda pa asina firma un MOU pa e desaroyo di e prome Aruba Hydrogen Valley den Caribe. Tambe lo designa e zona den refineria cu lo wordo destina pa tur e proyectonan energetico. E zona di refineria lo bira e parke industrial di e industria di energia na Aruba reserva pa e zona di energia. Pa e zonanan cu ta keda disponibel, gobierno lo tuma decision riba e redestinacion di e terenonan ey.
