A traves di un anuncio cu minister di Labor, Energia y Integracion, Glenbert Croes a haci recientemente relaciona cu yegada di e prome barco for di Venezuela cu HFO mas barata pa Aruba, e mandatario a sigura cu e producto ta den margen di e contract cu tin cu WEB Aruba N.V.

Gobierno di Aruba, specificamente minister Croes, for di algun tempo ta bin informando tocante e importacion di Heavy Fuel Oil (HFO) y cu e prijs di esaki ta demasiado caro, locual ta afectando e prijs di awa y coriente na Aruba. Tur esaki den cuadro di e maneho di transforma Aruba su dependencia riba crudo HFO pa un energia duradero, sostenibel, limpi y principalmente pagabel pa e pueblo consumidor, manera nan ta sigura.

Dia 15 di februari ultimo, minister Croes a anuncia e yegada di e prome barco for di Venezuela cu HFO mas barata pa Aruba. Den esaki, a splica cu ta pa por tin diferente oportunidad y alternativa di suministro di combustibel, Aruba ta den e proceso di transicion pa gas natural y mientras tanto, mester cumpra heavy fuel oil cu ta cumpli cu e specificacionnan cu WEB ta exigi, pero di paisnan cu ta ofrece mas barata, cu e meta pa baha prijs di awa y coriente.

Ta conoci cu e HFO ta un combustibel economico pero hopi contaminante, debi na su halto grado di azufre (sulfur) y nitrogeno, e nivel di emision di e sistema di combustion cu fuel oil ta mas halto cu esun cu e planta di fuel oil liviano ta genera, di manera cu HFO cada bes ta ser aplica menos den diferente pais.

Bon Dia Aruba a tuma contacto cu minister Croes pa ricibi informacion tocante importacion di HFO di Venezuela y di ki calidad specificamente grado di azufre tin aden, ya cu Venezuela no ta conoci pa HFO di bon calidad.

Si no tin HFO di calidad, WEB lo bolbe na e problemanan di emision cu tabata molestia empleadonan na waf di Barcadera.

Di su parti, minister Croes a sigura cu e specificacionnan di HFO cu Gobierno ta cumprando for di Venezuela mester ta pre-aproba door di WEB Aruba N.V y e ta den e margen. “Nos por cumpra sulfur entre 1.75 maximo 2 di su contenido y den e margen ey e HFO ta. WEB ta haya specificacionnan prome cu nan aproba pa nos por cumpr’e. E berdad ta cu na diferente pais ta produci diferente HFO cu ta ser traha cu contenido di azufre hopi halto. Na Mexico por ehemplo, ta produci hasta 3 grado di contenido sulfurico, Venezuela ta fluctua entre 2.3 cu 2.8, pero ora cu bo pidi nan pa produci HFO – y esey tur pais por – nan ta produci na e necesidad di e cliente cu ta cumpra,” el a sigura.

Door cu Aruba ta asina cerca di Venezuela, “e ta cumbini nos asina hopi pa cumpr’e pa rason logistico, pero tambe pa rason di prijs. Nos tin Colombia y Ecuador como alternativa, pero tur cos ta depende di prijs. Nos speransa ta cu for di Ecuador, a base di tur esfuerso cu a ser haci pa dos aña, e lo por produci un resultado”, minister Croes a señala.

Por a recorda cu minister Croes na augustus di 2022 a anuncia cu nan tabata reuniendo cu Gobierno Mericano riba tereno di Energia, pero muy en special cu OFAC, Office of Foreign Assets Control, pa Aruba por haya e licencia pa por cumpra HFO for di Venezuela pa un periodo di 2 aña y mey.

Mediante un comunicado, minister Croes a expresa di ta sumamente contento y orguyoso cu gobierno ta logra pa e prome barco di heavy fuel oil di Venezuela yega Aruba. Cu esaki por cuminsa e era pa logra baha e tarifa di awa y coriente, manera a ser priminti na e pueblo di Aruba. “Esaki sigur ta habri e caminda pa crea e oportunidad pa Gobierno por cumpli cu e promesa aki,” a sigura.

Igualmente nan ta sigura cu “un di e prioridadnan di Gabinete Wever-Croes ta pa combati costo di bida, y bahando e tarifa di awa y coriente, ta fundamental. Unabes cu logra baha e tarifa aki, e no lo solamente afecta positivamente cada hogar, sino tambe cada compania, reduciendo asina e gastonan di e compania. Cu menos gasto operacional, e companianan lo por cuminsa reduci prijsnan di producto y servicio pa e clientenan, afectando asina e costa di bida positivamente.”

Tambe, nan ta expresa cu esaki ta pa combati costo di bida, cu ta nifica combati pobresa, cu ta nifica logra progreso, “y esaki pa mi, como minister di Energia, y formando parti di Gabinete Wever-Croes II, ta e prioridad di mas grandi. Mi ta sumamente contento y orguyoso di mira cu e trabao cu nos a bin ta eherciendo tin su frutonan. Nos ta impulsando Aruba den un era nobo pa bienestar y na interes di nos Pueblo.”

Tambe mester enfatisa cu minister Croes y un comision a biaha pa Ecuador na 2022 cu e meta pa negocia e posibilidad pa Aruba por cumpra HFO na un prijs mas barata for di Petroecuador, pero te ainda esey no a ser concretisa.