Ayera den un conferencia di prensa, minister di Energia, Glenbert Croes a bisa cu diabierna awo un delegacion di gobierno di Aruba, presidi pa su persona como minister di Labor, Energia y Integracion hunto cu Sr. Edison Briesen, presidente di hunta di comisario di RdA lo sali pa Ecuador pa un mision di seis dia.

Durante e mision aki, e delegacion di gobierno di Aruba ta bay reuni cu gobierno di Ecuador y tambe cu e compania nacional di petroleo di Ecuador, PetroEcuador, den e esfuerso continuo pa mira e posibilidadnan pa por logra pa Aruba por cumpra HFO na bon prijs cu e meta di baha prijs di awa y coriente.

Segun minister Glenbert Croes, henter comunidad ta na altura cu gobierno a haci un esfuerso na Washington, y a indica cu “nos ta cautelosamente optimista di e esfuerso ey cu ta andando”.
“Nos ta inmensamente agradecido pa e apoyo cu nos minister plenipotenciario na Washington, Sra. Jocelyn Croes ta dunando nos den e esfuerso aki, full e team di embahada Hulandes na Washington. Tambe nos ta agradecido pa tur e atencion cu Departamento di Estado, Departamento di Tesoro, Departamento di Energia, e consideracionnan cu gobierno Mericano ta dunando e solicitud di Aruba cu mi a transmiti den e reunionnan.”

El a indica aworaki como followup, gobierno di Aruba ta den proceso pa manda un nota diplomatico cu apoyo tambe di gobierno di Hulanda pa haci e solicitud oficial.

Ademas, minister Croes a expresa “gratitud inmenso” na minister presidente Evelyn Wever-Croes cu durante reunionnan di OEA na Peru a reuni cu secretario di estado Mericano, Antony Blinken y recalca na nan como gobierno Mericano con importante e ta pa Aruba ricibi e apoyo pa e solicitud cu ta mandando gobierno Mericano. Croes a bisa cu e solicitud ta “principalmente pa bo haya un comfort letter, un waiver di cualkier riesgo” pa por cumpra HFO for di Venezuela. Actualmente esaki no ta posible debi na sancionnan cu Merca a impone riba Venezuela.

Segun Croes, e perspectiva ta cu HFO cu por haya for di Venezuela ta bin cu un descuento increiblemente substancial, asina grandi cu lo causa cu por reduci e prijs di awa y coriente cu ta paga na Aruba considerablemente.

“No ta momentonan facil pa nos na Aruba, pasobra ya caba bo ta weita cu hende a resalta cu nan recibo di awa of di coriente a subi mas di la cuenta.” Tocante esaki, Croes a indica cu e kehonan aki entre pueblo tin su atencion. El a bisa cu a reuni cu directornan di Utilities riba e tema, mirando cu nan a indica cu e averahe di aumento – si mantene e mesun consumo – mester ta di 22 porciento pa coriente y 26 porciento pa awa, dus mester controla kico ta pasando cu hende cu ta keha cu nan recibo a aumenta cu 50 of 100 porciento.

“Nos companianan WEB y Elmar riba propio iniciativa, pero tambe riba solicitud entre otro di mi, den nomber di gobierno di Aruba, a traves di nos director di Utilities a pidi pa e service desk, e help desk di WEB y Elmar ta disponible pa duna nos pueblo no solamente splicacion, pero pa check tambe si tin cosnan cu mester corigi, y tambe pa tene cuenta cu e capacidad di pago di tur famia”, Croes a indica.

El a añadi cu gobierno ta “empeña” pa haci tur maximo esfuerso pa por baha prijs di awa y coriente, expresando e dificultadnan cu e situacion mundial ta representa pa prijs di productonan petrolero. “Mi no sa awe mainta con halto e prijs di petroleo – cu ta afecta e prijs di HFO – a lanta, pero obviamente ora cu bo weita e desaroyonan atrobe di tension entre Ucrania y Rusia no ta yuda pa logra un reduccion relativamente permanente”, cu por impacta e prijs di awa y coriente. “Lamentablemente e tensionnan entre Ucrania y Rusia ta haci e mercado mas nervioso, ta hisa prijs. Obviamente e decision pa corta produccion di petroleo na mundo anuncia pa OPEC tampoco ta yuda e tema di prijs.”

Pa e motibo aki, gobierno a dicidi di no keda warda prijs di petroleo baha sino explora varios opcion, destacando cu tin procesonan andando tambe cu Colombia, y awo explorando opcion cu Venezuela y Ecuador. “Nos mester haci nos maximo esfuerso pa wak si na nivel di cooperacion entre gobierno nos por logra acuerdonan cu ta bay beneficia e meta pa [mitiga e efectonan di] e crisis energetico, e inflacion energetico, con hopi cu e ta aumenta e costo di bida, con nos por haci di nos banda pa alivia esaki.” El a indica cu Wever-Croes a haya for di Secretario di Estado Blinken un reaccion positivo ora el a trece dilanti e solicitud di gobierno di Aruba.

Tocante e mision na Ecuador, Croes a indica cu ta un placer pa reuni cu su colega Ecuatoriano, Sr.Xavier Vera-Grunauer. E reunion ta wordo coordina pa minister plenipotenciario di Aruba na Washington hunto cu embahada di Ecuador tambe na Washington. Ta haciendo e esfuerso aki pa tin varios opcion paralelo mientras ta warda resultado di e nota di solicitud oficial na gobierno Mericano pa por cumpra heavy fuel oil (HFO) for di Venezuela.

Croes a indica tambe cu Ecuador tambe a haci su due diligence riba Aruba, y ta sumamente impresiona cu e Politica Nacional di Energia, e Transicion roadmap cu ta encaminando na Aruba, y nan tin deseo pa den cuadro di henter e transicion energetico yega na cooperacion cu gobierno di Aruba.
“Pa e cooperacion energetico aki entre Aruba y Ecuador mi a pidi director di Utilities – como Utilities ta e instancia pa coordina e posible cooperacionnan cu por resulta.”

Croes a splica cu e prome meta ta pa logra un acuerdo specifico cu PetroEcuador, den e caso aki Fuel Marketing Supplies Aruba, “cu ta subsidiario 100% di RdA, un compania 100% di gobierno di Aruba lo ta encarga di e transicion aki, pa mientras ta warda decision di gobierno Mericano por cuminsa trece alivio pa pueblo.”

Sinembargo, el a indica cu ainda mester atende temanan, manera e contract actual cu proveedor actual di HFO, for di ken ta “cumprando na prijs caro, tin proveedor confiable pero hopi caro”. Croes a indica cu esaki ta afecta e prijs di awa y coriente. Pero si logra cu e perspectiva na Ecuador y Venezuela, ta tuma accion proactivo pa trece alivio cu reduccion di prijs di awa y coriente, el a finalisa.