(DutchNews.nl) – Minister di Educacion Hulandes, Robbert Dijkgraaf a skirbi na universidadnan y HBO colleges pidiendo nan pa stop di recluta activamente studiantenan den exterior.
E accion di e minister ta sigui un voto na fabor di e movida aki den Parlamento fin di luna pasa. Parlamentarionan ta bisa cu e aumento den cantidad di studiante, impulsa pa un aumento den cantidad di studiante internacional, ta aumentando presion riba e capacidad di vivienda pa studiante y conduciendo na lokaalnan di les demasiado yen. Nan ta spera cu un prohibicion riba aviso (propaganda) y feria di reclutamento den exterior ta bay reduci e fluho.
E aña aki, alrededor di 40 porciento di studiante di prome aña – 42mil den total – ta bin di afo, maske mayoria ta for di Union Europeo. Dijkgraaf a bisa den su carta cu mientras cu tin aspectonan positivo pa tin un cuerpo estudiantil internacional, e impacto negativo – manera presion riba personal di educacion y riba vivienda – ta demasiado grandi. “Ademas, a largo plaso e por menasa e continuidad, pagabilidad, y calidad di e sistema di educacion avansa Hulandes”, el a bisa.
Dijkgraaf a priminti di publica otro plannan pa pone limite riba cantidad di studiante internacional pa comienso di proximo aña, pero parlamentarionan a bisa cu esaki lo ta demasiado laat pa stop universidadnan di atende ferianan y pone aviso pa atrae studiantenan nobo den proximo aña academico.
E aña aki, un cantidad di universidad a haci un yamado pa studiantenan internacional no acepta nan lugar na Hulanda si nan no a haya un lugar pa biba prome cu nan yegada.
