(NLTimes)—Minister di Educacion na Hulanda, Robbert Dijkgraaf, a bisa cu su mes persona lo interveni si demasiado studiante stranhero bin studia na Hulanda. E minister a anuncia cu su plan ta pa determina e cantidad di studiante stranhero desea riba nivel nacional, pero el a pone e responsabilidad tambe primeramente riba universidadnan.
Dijkgraaf a bisa cu e solamente kier tuma accion si nan fracasa, y cu e no ta sigur con e lo interveni. E no kier duna institucionnan mas opcion pa limita e entrada. Ademas el a urgi pa studiantenan considera siña Hulandes como un opcion.
Mester ta posibel pa solamente admiti un cantidad maximo di studiante pa un programa cu tin variante den Ingles, segun Dijkgraaf a argumenta diabierna. E ora e provision cu no tin limite vast di cuanto studiante ta permiti pa drenta un programa mester aplica solamente pa programanan duna den Hulandes.
Actualmente, esey no ta posibel, cual ta haci’e dificil pa universidadnan stop e entrada di exclusivamente studiante stranhero. Si pone limite di capacidad riba programanan duna na Ingles y nan bira demasiado yen, Dijkgraaf kier duna prioridad na studiantenan Hulandes y otro paisnan Europeo.
E minister ta kere cu politiconan nacional mester considera con hopi studiante internacional por wordo acomoda, ambos den “sociedad y e sistema.” Tambe el a bisa cu e kier tuma nota di e “demanda pa talento” y e strategianan di crecemento na Hulanda.
“Loke ta preocupa mi ta cu e calidad halto di e sistema Hulandes lo cay bou asina tanto presion” cu e situacion ta cambia completamente prome cu Cabinet por haci algo, segun Dijkgraaf a expresa. “Si no aborda esaki, e por causa salanan di lectura demasiado yen, trabou mas pisa pa lectornan y un falta den acomodacion, y e ta pone presion riba e accesibilidad di programanan di estudio.”
Tin necesidad grandi di studiantenan internacional pa algun estudio den sectornan di crecemento manera ICT y tecnologia, y pa profesionnan cu ta sufri di deficit den personal. Dijgraaf a enfatisa cu e kier sigui provee solucionnan special pa e estudionan aki. Tambe e kier tuma na cuenta e necesidadnan specifico di diferente region, manera universidad cerca di e frontera di Alemania y Belgica.
Hulandes mester keda e lenguahe principal den educacion mas halto, Dijkgraaf a expresa. P’esey e ta bay haci e condicionnan mas streng pa esaki. El a argumenta cu ta miho pa sigura cu institucionnan no scoge Ingles innecesariamente como e lenguahe di instruccion.
E minister tambe kier encurasha studiantenan internacional pa siña Hulandes. ISO, un organisacion di studiante den varios ciudad na Hulanda, a bisa cu ta tempo pa tuma medidanan asina. Pero e presidente di e organisacion a subraya cu e medidanan aki mester haya apoyo di Cabinet.
