“E maneranan cu gobierno por interveni den propiedadnan priva di hende ta hopi limita. Pero nos t’ey si pa mustra nan kico ta tur e oportunidadnan.”
Esey minister di Asuntonan Economico Richard Arends ta contesta Bon Dia Aruba riba e pregunta dicon tin asina hopi edificio bashi cu ta concentrando mas tanto na final di Caya Betico Croes. E ta laga sa cu e rol di gobierno ta pa djis avisa e inversionista na kico tur e por haci pero no mas cu esey.
10 edificio bashi den mal estado
Nos redaccion a tuma nota di por lo menos dies edificio bashi cuminsando for di Botica Oduber te na Burger King den Caya Betico Croes. E edificionan aki ta bashi pa basta tempo caba y algun ta den estado hopi deplorabel caminda cu por mira entre otro daknan cu a sak den otro. Esaki ta capital cu ta keda para eynan anto como gobierno ta dificil pa bisa un doño kico pa haci cu su propiedad segun minister Arends. “Gobierno den pasado a papia hopi cu e doñonan di e edificionan pa splica kico ta e maneho y kico ta bay bin. Desafortunadamente nos a haya inversionnan priva no a bay mesun lihe cu inversionnan publico.”
Ideanan nobo
E ta laga sa cu semper nan ta keda den dialogo cu e comerciantenan/doñonan aki. “Nos a wak desaroyonan hopi positivo por ehempel den Wilheminastraat unda antes tabata Brenchie’s. Bo tin un area completo di supermercado , e plaza cu a wordo construi cu fondonan priva unda hendenan ta bin hunto y duna lesnan di baile. Algo full otro cu Wilheminastraat tabata ta.” E inspiracion aki e mandatario ta splica ta locual gobierno kier transmiti na e doñonan di e edificionan den caya mes.
“No pensando solamente riba comercio pero tambe horeca, vivienda etc. Tur esey nos ta facilitando y haciendo posibel.” Obviamente nan ta doñonan di nan mesun edificionan unda cu mester paga huur den caya riba un suma di 10.000 pa 15.000 florin segun e mandatario. E ta conclui finalmente cu esunnan cu ta huur e edificionan tin hopi retonan.
