Durante un conferencia di prensa na ArtisA e siman aki, minister di Asunto Economico, Comunicacion y Desaroyo Sostenible, Geoffrey Wever a contesta preguntanan di prensa tocante desaroyo di area di San Nicolas, expresando cu desaroyo di San Nicolas mester bay segun e deseo di tur e stakeholdernan.
A puntra Wever con ta bayendo cu plannan pa desaroyo di San Nicolas, y el a indica cu “nos tin basta tempo ta preparando e prome proyecto pa San Nicolas, e prome proyecto cu nos kier desaroya”. Wever a indica cu el a tuma contacto cu San Nicolas Business Association hunto cu arkitecto cu ta yudando e ministerio pa cuminsa intercambia idea pa sigura cu ta riba mesun linea cu e asociacion y tur stakeholdernan di p’ariba di brug. “E ora mi a puntra nan si nos por haci tambe un caminata pa nos identifica e zonanan cu nos ta kere cu tin e potencial, caminda cu, cu poco fondo toch nos por realisa impacto grandi”, el a contesta.
Wever a agrega cu a scoge e maneho aki tambe pa Oranjestad, caminda a haci e mesun tipo di acercamento cu a resulta bon, y pronto lo haya cierto anuncio tambe relaciona cu proyectonan concreto cu ta bay sali. “Pero e ora ban bisa cu nos a haya e modelo cu ta funciona bao di e situacion dificil den cual e pais ta aden. Mi ta kere e ta un bon formula tambe pa replica esaki den area di San Nicolas.”
El a bisa cu pa e motibo aki nan a bin hunto y a realisa di biaha cu e pensamentonan ta alinea cu stakeholdernan. “Esaki no ta nifica cu loke nos ta bay presenta ta bay ta definitivo, pero e ta duna nos un base si pa presenta e prome propuesta cu lo mester haya mas input di tur e stakeholdernan. Pero e prome paso tabata pa sigura cu e vision di gobierno ta cuadra cu e vision tambe di San Nicolas Business Association, pa nos ta sigur cu ora cu nos haci algo, e ta refleha tambe e deseo di tur e stakeholdernan.”
El a bisa cu a haci palabracion cu na e momento aki ta bay back na completa e prome diseño di e area cu kier drecha, y cu e concepto su tras, dun’e su contenido pa por bin back y papia cu un grupo di stakeholder mas amplio, “pa nos ta sigur cu e fondonan cu ta wordo aloca ta fondonan cu ta carga aprobacion di e area.”
A puntra Wever tocante resultado di un sondeo cu a haci entre diferente comerciante di San Nicolas, cu un di e peticionnan mas grandi tabata pa gobierno trece algun oficina p’ariba pa crea un bida diferente pa residentenan di e area. Wever a contesta: “Tin diferente di e tipo di pensamentonan ey, pero toch mirando cu na e momento aki e deseo tabata pa San Nicolas ta e ‘creative city’, esey tambe mester tin mas enfoke riba dje, esey ta e situacion aworaki. Ta keda na nos pa sigui duna contenido na esey.”
El a conclui bisando: “Personalmente na e momento aki mi no ta wak cu trece tur e departamentonan p’ariba ta bay cuadra cu e vision di e mesun stakeholdernan di e area, y e esfuersonan cu ta canando caba, cu a wordo haci caba, cu tin diferente inversionista, artistanan local.”
