Despues cu Lotto pa Deporte a publica nan articulo, den cual ta indica cu ‘maneho di gobierno a causa cu ta invertiendo menos den deporte’, minister di Salubridad Publico, Turismo y Deporte, Dangui Oduber a duna un reaccion na un portal noticiero online den cual el a expresa di ta sorprendi pa e postura di Lotto.
“Ta hopi peculiar pa netamente esnan cu tin deporte sangrando, esnan cu tin e fondonan pa yuda deporte kier busca otro pa culpa siendo cu nan ta esnan responsabel pa e negligencia den deporte,” Oduber a declara na e noticiero online Noticia Cla, den un relato publica riba nan website. E mandatario a declara cu ‘simplemente ta un abuso’ cu na momento cu Lotto ta bende 60 miyon florin, apenas 4 miyon florin ta bay inverti den deporte, y e 11 miyon restante ta bay Canada.
Maske no a duna un declaracion oficial na tur medio di comunicacion, e mandatario si a bisa Noticia Cla cu e ‘no por a kere loke ta para’ den e declaracion di Lotto, cu ta publica riba pagina 10 di e edicion aki di Bon Dia Aruba. Segun e relato di Noticia Cla, Oduber a indica cu ta un grupo di activista di AVP a secuestra lotto, masacra deporte, laga deporte sufri, keda sin inverti, y awo kier culpa gobierno.
“E director actual tabata consehero di ex-minister Schwengle di AVP cu a wordo poni eynan sin vacature, sin sollicitatie pa tin un salario di 15.000 florin pa luna, mientras deporte no ta haya su fair share,” Oduber a continua bisando den e relato. “Awor cu den aña 2020 segun Lotto cu nan a bende menos, nan no kier cumpli cu e acuerdo pa duna SSA e fondonan segun contract. Tempo nan a strica mas di 60 miyon florin na benta si nunca nan a pensa pa duna deporte mas, pero awor cu a bende menos kier duna deporte menos.”
Pa conclui, e mandatario ta acusa Lotto di hiba un maneho financiero desastroso, sin presenta cuentanan anual ni tuma responsabilidad pa e ‘deroche’ di placa di deporte.
