Weekend ultimo, den un evento di Minister di Enseñansa y Deporte Sr. Endy Croes na Double Down Sports Grill, a anuncia cu desde 1 di september 2024 Fundacion Lotto pa Deporte (FLPD) su operacion legalmente ta back den man di Aruba. Alabes, e logro di mas grandi ta e cambio di e contract existente desbentahoso firma na aña 2011 pa un contract nobo y digno pa deporte y pa Pueblo di Aruba.
Den un comunicado di gobierno a recorda con na 2011, bao gobierno di AVP, a firma un contract unda a traspasa operacion di Lotto pa Deporte den su totalidad pa Canada (CBN). A lanta un di dos compania na Aruba CBN/Aruba, cu tabata opera y maneha e loteria pa CBN. Desde aña 1999 cu CBN a drenta Aruba, nan a cera un contract cu Lotto pa Deporte, unda tin un ‘management fee’ incorpora di 8.25%. Pues di e benta bruto di Lotto pa aña, CBN ta ricibi 8.25%.
Na aña 2011 bao un scenario cu AVP a crea e directiva di turno cu sosten di Mike Eman, Mike de Meza y Richard Visser a firma un contract nobo. Akinan nan a traspasa e operacion total den man di Canada y a bay di acuerdo pa Canada mantene 8.25% di ‘management fee’. Adicionalmente, a duna Canada 15.25% extra como ‘technology fee and operating expenses’. Pues un total di 23.5% di e benta bruto pa CBN, en bes di 8.25%. Segun e comunicado, esaki pa Gabinete Wever Croes y pa Minister di Deporte ta algo amargo pa no bisa inaceptabel. “Nos ta mira e dolor den infrastructura di nos facilidadnan y nos deportistanan y notabel ta cu e ‘fair share’ no ta yegando cerca nan. Pa cu esaki a invita CBN pa un reunion cu e vision y mision pa renegosha un contract nobo na fabor di Pais Aruba y na fabor di nos deporte en general.”
Den e comunicado, minister di Deporte ta bisa cu ta contento cu CBN a acepta pa reuni y duna contribucion den henter e proceso. Na juli 2022 e CEO di CBN y su staf a bini Aruba. Minister Endy Croes hunto cu Minister President Evelyn Wever-Croes a reuni cu e team di CBN y a indica e caminda cu nos como Pais Aruba kier en camina. Lotto a forma un team di experto di 7 hende, incluyendo 3 abogado, 2 miembro di Raad van Toezicht y expertonan financiero. A anuncia a traves di un conferencia di prensa cu e negociacionnan ta bay inicia pa cambia e contract.
Fin di aña 2022 a palabra cu CBN lo siguiente: CBN lo bin Aruba na inicio di aña 2023 cu nan team di negociante y gobierno lo reserva 7 dia cu nos team di 7 pa e dos team por sinta repasa tur cos henter dia di mainta pa anochi y CBN lo regresa te ora logra firma un acuerdo nobo.
Prome siman di februari 2023, CBN su team a yega Aruba y dia 10 di februari anochi a logra yega na otro den un contract nobo unda e 23.5% di benta bruto a keda rebaha pa 8.25% y Aruba a bay dilanti den e deal nobo cu 15.25%. Alabes, ta traspasa operacion den su totalidad pa Aruba y CBN lo apunta tres (3) persona cu lo keda den operacion cu lo garantisa e continuidad. CBN lo paga tambe e tres persona cu CBN lo apunta for di nan ‘management fee’ di 8.25% y no for di payroll di FLPD.
Kico mester a haci?
Desde februari 2023 cu a firma e contract nobo, a palabra un serie di trabao cu mester realisa pa asina determina e ‘hand over date’ oficial pa e contract drenta na vigor. En realidad tabatin un proceso largo meymey. Mester a haya un conseho oficial di DWJZ riba un acuerdo cu Pais Aruba y ahusta e formato di un prestamo cu Pais Aruba a yega di presta Lotto. Tur esakinan a ser haci cu exito, segun e comunicado. Mester a traha riba varios Jaarrekening atrasa y a dura por lo menos un aña pa logra cera y aproba Jaarrekening di aña 2020-2021-2022. Esakinan tur a keda cla y ta na ordo awo, e comunicado ta indica.
FLPD tabatin un prestamo na aña 2022 di 12 miyon cu un banco local di cual CBN tabata para garantia. Den e proceso cu Aruba ta tuma ful maneho y operacion back, Lotto mes mester a percura pa por financia esaki. Manera a logra cera tur Jaarrekening ariba menciona tabata tin banconan cla pa ricibi Lotto y asina a logra kita e carta di garantia di CBN y Lotto mes a tuma over esaki. Por ultimo, ora tur esakinan a keda cla a palabra luna pasa cu CBN un ‘hand over date’ pa 1 di september 2024. Esaki a ser anuncia diasabra ultimo, cu desde 1 di september oficialmente FLPD (Fundacion Lotto pa Deporte) ta back den man di Aruba bao di un contract nobo, unda e logro mas grandi ta e reduccion di e ‘fee’ cu tabata bay Canada cual a baha di 23.5% pa 8.25%. E ‘fee’ di 8.25% ta unda el a cuminsa desde 1999.
