(NLTimes) – Minister di Defensa Ruben Brekelmans no ta descarta mas negociacionnan cu Rusia riba paz na Ucrania, el a bisa den un entrevista cu e corant Trouw. Den su opinion, lidernan Europeo mester tuma e iniciativa prome cu Donald Trump haci’e.
Segun e minister, tin un sentido di urgencia. Trump lo ser instala como presidente di Merca dia 20 di januari y a bisa repetidamente cu e kier caba cu e guera na Ucrania rapidamente.
“Nos mester zorg pa paisnan Europeo ta na mesa pa Trump no dicidi cu Putin riba e arkitectura di seguridad na Europa,” Brekelmans a bisa den e entrevista.
Esaki ta e prome biaha cu Brekelmans a trata e opcion di combersacionnan di paz asina abiertamente. Te awor, e posicion di e Gabinete tabata cu negociacionnan mester tuma luga solamente ora Ucrania tabata cla.
Desde cu Trump a wordo eligi, e combersacion a cuminsa tambe na Europa. Brekelmans ta papia di un “aceleracion.” Diahuebs ultimo, presidente Frances Emmanuel Macron y prome minister Polaco Donald Tusk a papia cu otro na Warschau tocante un proceso di paz.
Cu 27 estado miembro, ta dificil pa yega na un consensus den Union Europeo riba decisionnan tocante un posibel forsa di mantencion di paz, asina e minister a bisa. “Mirando e urgencia, bo por dicidi di no warda riba unanimidad den ningun contexto.” P’esey el a menciona e opcion di haci esaki cu un grupo di pais.
