Wardacosta di Caribe, desde su creacion na 1996 a demostra di ta un relacion di cooperacion exitoso y unico, entre e cuater paisnan di Reino Hulandes. Asina Minister di Defensa di Hulanda, Ank Bijleveld-Schouten a informa den un carta na Presidente di Tweede Kamer.

E carta ta den cuadro di e stipulacion di e declaracion presupuestario di e Ministerio di Defensa pa 2021. E carta ta trata e Plan di Termino Largo 2019-2028 di Wardacosta pa Reino Hulandes den e area di Caribe, y acuerdonan administrativo cu ta encera e palabracionnan financiero di e plan. Conseho di Minister di Reino a ricibi e plan y acuerdonan administrativo na fin di Mei.

Vinculo indispensabel

Wardacosta ta, como e forsa pa mantene ordo y legalidad riba lama, ta un vinculo indispensabel den e parti Caribense di Reino Hulandes. E instancia ta dirigi su mes particularmente riba e fronteranan extremo maritimo pa motibo di e caracter transfronteriso di criminalidad. Banda di esey, Wardacosta di Caribe ta ehecuta tareanan importante riba tereno di deteccion, supervision, ‘Search and Rescue’ (SAR) y duna asistencia ora di desaster.

E complehidad y diversidad di su pakete di tarea ta exigi den hopi caso, un acercamento cu ta afina na nivel integral cu ta sosteni pa henter Reino. Esaki ta conta tanto pa e esfuerso operacional como tambe e palabracionnan na nivel di administracion y politico.

Venezuela

E ta di importancia esencial pa garantisa cu Wardacosta por keda actua operacionalmente na tur momento y tambe percura cu e ta keda duradero, particularmente den e temponan aki unda tin di haber cu un Venezuela hopi instabil cu ta crea un problema di migracion. Banda di e problema di migracion, tambe tin casonan grandi di traficacion di hende y comercio, aumento di criminalidad di droga, cambio di clima cu ta produci tempo extremo.

Reemplasa ekipo

Pa por sigui cu e ehecucion di e tarea di Wardacosta, mester cambia e ekiponan periodicamente. Conseho di Minister di Reino a duna instruccion na Defensa cu ta encarga pa maneha Wardacosta pa desaroya e Plan di Termino Largo, pa asina tin un miho maneho riba e proceso aki.

E plan ta duna bista riba e proposicionnan di maneho y cua ta e capacidadnan cu mester keda reemplasa pa e periodo stipula, te 2028. Tambe e plan ta ilustra con Wardacosta mester desaroya su mes a largo plaso y cua base financiero e desaroyo aki ta rekeri.

E Plan di Termino Largo a keda desaroya den ultimo añanan den deliberacion cu tur e paisnan y cu envolvimento di tur departamento cu ta representa den e comision Wardacosta. Ademas, a discuti riba y a revisa e plan diferente biaha den e Presidio di Wardacosta como tambe den e comision Wardacosta den e ultimo periodo.

E Plan di Termino Largo ta acapara un suma di 168 miyon euro, esta 368 miyon florin cu ta e inversion pa cambia e materialnan y ekipo, cu ta stipula na 160 miyon euro of 350 miyon florin y gasto di operacion cu ta di 8 miyon euro, cu ta 17.5 miyon florin. E punto di salida di e Rijkswet Kustwacht, articulo 13, ta cu e financiamento pa Wardacosta ta carga pa tur pais di Reino. Pa esaki a determina un clave di distribucion, unda Hulanda ta asumi 69 porciento di e gastonan, Corsou ta carga 16 porciento, Aruba ta paga 11 porciento y St. Maarten ta asumi cuater porciento di e gastonan. E contribucion financiero di Hulanda ta sali di e presupuesto di Defensa. Y aki a registra cu ya caba, a demarca un suma di 150 miyon euro den e presupuesto di explotacion cu ta specificamente dirigi na e capacidad di reconocimento area (control area). E gasto aki, segun e sistematica di calculacion ta cay completamente pa cuenta di Hulanda. E sumanan adicional pa e capacidad aki, cu ta calcula na 80 miyon euro, lo keda reparti segun e clave di distribucion stipula pa e rijkswet.

Presupuesto preta di Aruba

Gabinete Hulandes a pone structuralmente, desde 2018, anualmente un suma di 10 miyon euro disponibel como e contribucion di Hulanda pa ehecucion di e tareanan di Wardacosta. Pa motibo di e presupuestonan preta di paisnan Corsou, St. Maarten y Aruba, “ami como e persona responsabel pa presupuesto di Wardacosta a haci un oferta na e respectivo Ministernan di Husticia y Finanzas di e tres paisnan, pa financia un parti di e inversionnan y den e sentido aki, ofrece e paisnan e posibilidad pa cumpli cu nan pagonan segun nan presupuesto ta permiti. Corsou, St. Maarten y Aruba a haci uso di e oferta aki, cu ta implica cu a haya un cobertura conhunto pa e inversionnan necesario pa asina por reemplasa e diferente ekiponan pa Wardacosta,” e Minister di Defensa Demisionario Ank Bijleveld Schouten a informa Tweede Kamer.

Lo cuminza paga na 2022

Aruba lo contribui desde 2022 te cu 2028, anualmente cu un suma di 2.64 miyon euro of 5.8 miyon florin. Corsou a confirma cu entrante 2023 te cu 2029, lo contribui cu 3.84 miyon euro of 8.4 miyon florin, na e inversionnan poni den e Plan di Termino Largo. St. Maarten a bisa cu entrante e aña aki caba te cu 2028 lo pone disponibel tur aña 0.84 miyon euro of 1.8 miyon florin. Hulanda ta contribui caba desde 2018 y te cu 2028, anualmente cu e suma di 10.54 miyon euro, cu ta mas cu 23 miyon florin.

E cuadro financiero pa e inversion di reemplaso di e capacidad y ekiponan di Wardacosta manera ta determina den e plan ta firma pa tur e paisnan di Reino.

“Hunto nos lo keda dirigi nos mes riba resultadonan bon y duradero di Wardacosta pa area di Caribe, a base di capacidad di carga, interes comun y un responsabilidad comparti denter di Reino Hulandes,” e Minister di Defensa demisionario a conclui.