Durante weekend, Darren van Ommeren, presidente di SMAC y minister di Cultura, Xiomara Maduro a enfrenta otro den un guera di palabra tocante participacion den Carnaval. Na final, parce cu e disputa a keda resolvi.

Tur cos a cuminsa na momento cu a ripara cu prome minister of minister di Cultura no tabata haciendo e acto di coronacion den algun evento di Carnaval, manera ta tradicion.

Medionan di comunicacion local a acerca presidente di SMAC, Darren van Ommeren, kende a confirma cu a bin cu otro maneho. Van Ommeren a splica cu, cu ocasion di e di 10 aniversario di SMAC, a dicidi di duna diferente ‘honor’ na persona, institucion of organisacion cu a coopera cu SMAC durante e 10 aña aki. Esaki tabata e caso por ehemplo na momento cu CEO di ATA, Ronella Croes, a cende e flambeu cu a haci apertura di Parada di Flambeu (Lighting Parade.)

Maske Van Ommeren a bisa cu e decision tabatin motivacion politico, si el a menciona cu SMAC no ta conta cu sosten financiero di gobierno di Aruba, indicando cu e organisacion ta depende completamente di sector priva pa patrocinio. El a bisa cu gobierno ta coopera door di duna permiso na cierto instancia di gobierno, manera polis y DOW, pa presta servicio pa SMAC.

Reaccion di minister di Cultura
 Riba su pagina di Facebook, minister demisionario di Cultura, Xiomara Maduro a comparti un screenshot di Van Ommeren mientras e tabata duna comentario na prensa local. El a reacciona bisando cu “Darren y SMAC no kier pa minister di Cultura y tampoco Minister President forma parti di Carnaval.”

“E motibo segun Darren,” Maduro a skirbi, “ta pasobra gobierno no ta duna SMAC placa. Wel, gobierno ta yuda SMAC cada aña cu 1.2 miyon florin na servicio cu ta wordo duna for di varios departamento di gobierno. Sin e servicionan aki, SMAC no por garantisa Carnaval di Aruba.”

Maduro tambe tabatin clarificacion tocante e contribucion di otro organisacionnan cu ta sostene SMAC y cual Van Ommeren a ‘honra’ cu cierto accion den Carnaval. “Darren y SMAC ta lubida cu e sponsor di ATA y UNOCA ta fondo publico e ta cu ta wordo genera y administra pa Gobierno di Aruba. Sin conta cu

e oficina cu SMAC ta aden na Plaza Betico Croes ta Gobierno di Aruba ta paga p’e.”

Finalisando, Maduro a skirbi: “E ta un falta di respet pa Darren y SMAC trata asina cu Minister di Cultura y Minister President di Aruba cu ta den funcion di representacion di Pueblo di Aruba. Anto ta danki na e vergunning cu Gobierno di Aruba ta otorga na SMAC, nan por organisa Carnaval. Mundo riba su cabes berdad.”

Prome minister ta haci e acto di coronacion

Pa ayera tardi, ya medionan local tabata reportando cu SMAC a cambia di opinion, y a dicidi pa permiti e minister presidente corona reinanan di Carnaval manera tabata custumber en bes di duna e honor aki na patrocidnadornan di SMAC.

Sinembargo, despues cu gobierno a expresa malcontento cu e decision aki, a reporta cu SMAC a haci un invitacion pa minister president, Evelyn Wever-Croes corona Reina Grandi y Sra. Carnaval ayera nochi.

Manera tur aña, esaki no tabata e unico critica contra e organisador di Carnaval. Otro incidente cu a hala atencion tabata riba e red social X, unda hopi ta gusta expresa nan comentario en bibo riba eventonan di Carnaval, specialmente Eleccion di Reina. Un cuenta cu ta hala hopi atencion ta di celebridad y diseñador di moda, Ronchi de Cuba, kende ta deleita cu su comentarionan skerpi pero al caso.

Y un comentario cu sigur a hala atencion tabata momento cu el a bisa cu el a scucha algo cu cual e no ta di acuerdo: “No ta adecuado pa famia di un candidata sponsor SMAC,” el a comenta. Na final, De Cuba mes a aclaria cu SMAC a informa su persona cu “e no ta un sponsor financiero. Cu e compania ta cu nan desde cu Darren a bira president. E compania ta yuda cu warda carosa y skelet di Momo.”

Di su banda, SMAC su cuenta oficial a repost e aclaracion di De Cuba.