Den cuadro di e reapertura di Museo Arkeologico Nacional Aruba (MANA), situa den pleno curason di Oranjestad y den e bario historico di Rancho, Minister Xiomara Ruiz-Maduro a expresa su satisfaccion cu e echo aki. Pero tambe el a anuncia cambionan den e maneho di e museo.
El a bisa cu e proceso pa crea un fundacion autonomo lo percura pa existencia di MANA por sigui. E Minister di Cultura a agrega cu MANA a demostra, di un forma profesional, cu por hiba un maneho sostenibel di nos herencia arkeologico.
E mandatario a informa cu pronto nan ta bay traha riba maneho pa e museonan, caminda nan lo envolve tur museo. “Pa medio di un maneho pa museo nos por traha di un forma mas structura y na bienestar di tur museo na Aruba,” el a bisa.
Segun nos Minister di Cultura, e organisacion International Council of Museums (ICOM) a adapta nan concepto di museo e aña aki, poniendo enfasis riba e tarea multidisciplinario di un museo. Banda di tur e tareanan cu nan tin, e museonan ta duna un aporte tambe riba desaroyo cultural, social y economico di un pais.
Pa e motibo aki, e ta considera importante pa gobierno di Aruba por desaroya un maneho di museo. El a indica cu cada museo tin e potencial di contribui na un desaroyo duradero di nos generacion di awendia. P’asina nos hobennan por compronde nos pasado miho y pa nan por traha pa bienestar di Aruba un miho futuro pa nos pais.
