Ayera mainta, Minister di Asuntonan Social y Labor, Glenbert Croes a ofrece un conferencia di prensa pa medionan local den cual el a duna di conoce aumento di salario minimo. Asina mes el a trece dilanti e aprobacion di parti di Parlamento pa Sociaal Crisisplan sigui traha den aña 2020.

Croes a informa riba salario minimo, cu lo conoce un aumento entrante januari 2020 y lo bira 1815,35 florin. Di esaki el a sostene cu for di october nan a pidi departamento di Labor pa conseho riba esaki, premirando e desaroyo riba costo di bida. Tambe a pidi Sociaal Economische Raad (SER) nan conseho, teniendo na cuenta loke nan a haya di departamento di Labor pa loke ta trata e costo di bida. E tres partido cu ta conforma SER – cu ta gobierno, sector laboral y comercio – a duna nan conseho pa aumenta e salario minimo cu 3%.

Ademas, el a informa cu segun reporte di Central Bureau of Statistics (CBS) pa loke ta trata bestaansminimum, un ciudadano, pa por sobrevivi na Aruba, mester di 2.382 florin, pa loke Croes mes a bisa ‘esey ta nifica cu ainda nos ta leu di cas’. Un tata cu mama y dos yiu, pa por sobrevivi mester di 5.002 florin. Saliendo for di e punto di bista aki, tur hende cu ta cobra salario minimo ta den pobresa.

E cantidad di hende cu ta trahando den mercado laboral na Aruba, segun e ultimo rapport cu a sali di departamento di Labor, ta 51.777 hende. Esunnan cu ta cobra salario minimo ta alrededor di 9% loke ta representa 4.428. Tambe a sigura cu e cantidad di hende cu ta gana menos cu salario minimo y hende cu ta cobra menos cu bestaansminimum ta duna e cantidad di 25.483 hende.

Di esaki, Croes a resalta cu a pesar cu nan ta traha riba un proceso di husticia salarial y husticia social, e realidad tambe ta fundamental.

El a reconoce cu ‘e costo di bida ta caro, pero tambe nos tin cu reconoce cu na Aruba e prijs cu tur hende ta paga pa biba akinan, ta un prijs pa nos tin tur loke nos tin’.

Tambe a bisa cu ‘e aumento di salario minimo lo duna ciudadanonan un poder di compra mas halto, cu nan lo por gasta mas’, cu por uza pa mehora nan calidad di bida combina cu e reduccion di coriente y tur e otro asistencianan social cu nan ta duna.

Tocante Sociaal Crisisplan, Croes a splica cu hunto cu trahadonan profesional den sector social cu ta den diferente ministerio trahando pa implementa y atende e emergencia social cu ta presenta den comunidad, Parlamento a duna nan e oportunidad pa renoba e contractnan di tur profesional den sector social.

Di mesun manera, Croes a bisa cu nan a organisa un dialogo tripartite social laboral cu e tema di ley di ARBO. Un ley cu ta regarda con lo sigura e bienestar, siguridad y salud di e trahadonan na pia di trabou. Esaki a ser revisa y discuti durante e dos dia cu e dialogo a dura y a celebra e hecho cu unanimemente e tres partido di Gobierno di Aruba, sindicatonan y comercio a haya di otro un producto final.

Tocante esaki, el a duna di conoce diamars ultimo cu Conseho di Minister a aproba e proposicion cu a sali for di e dialogo aki y e trayecto legislativo pa cu esaki bira ley ta cuminsa y lo traha riba dje pa por continua su trayecto, pa despues bay Raad van Advies y Parlamento.