Minister di Asuntonan Economico, Comunicacion y Desaroyo Sostenibel, mr. Geoffrey Wever, ta informa cu economia di Aruba ta sigui mustra un crecemento positivo segun e ultimo publicacion “State of The Economy 2024 Q1” di Banco Central di Aruba.
Den e prome tres lunanan di 2024, indicadornan pa consumo manera importacion di mercancia y consumo di utilidad ta mustra un crecemento compara cu e mesun periodo di 2023. Indicadornan pa inversionnan ta mustra un crecemento den balor di hipoteca nobo pa cas y mientras indicadornan manera importacion di metalnan basico y trabounan deriva, materialnan di construccion y hipoteca comercial nobo ta mustra un caida.
Banco Central di Aruba ta indica cu den e prome lunanan di 2024 Aruba su economia a crece cu 11,2 porciento den termino real. E crecemento aki ta e resultado di e desaroyo positivo den e industria turistico y inversionnan relata na esaki.
Pa luna di maart 2024 e inflacion tabata 2,1 porciento. E inflacion midi riba un promedio anual a sigui baha como di e caida den e contribucion di e subida den tarifa pa utilidad den augustus 2022, prijsnan di gasolin y diesel mas abou, y normalisacion den prijsnan pa cuminda. Pa 2024 Banco Central di Aruba ta proyecta un inflacion di 1,6 porciento.
“E prome lunanan di 2024 ta mustra un desaroyo positivo di nos economia. E desaroyo aki ta den liña cu e proyeccionnan di economia banda di Banco Central di Aruba tambe di Departamento di Asuntonan Economico y Fondo Monetario Internacional pa 2024. Publicacion di Banco Central di Aruba ta importante den analisis economico di nos pais y ta contribui pa decisionnan economico,” segun minister Geoffrey Wever a expresa den un comunicado di prensa. Tambe a indica cu Ministerio di Asuntonan Economico, Comunicacion y Desaroyo Sostenibel lo sigui monitor e desaroyo di nos economia.
