Den cuadro di e reformanan economico pa mehoracion di e clima empresarial y di inversion na Aruba, Minister Geoffrey Wever a organisa siman pasa un reunion informativo unda a invita miembronan di directiva di Aruba Trade and Industry Association (ATIA), Kamer van Koophandel en Nijverheid Aruba (KvK), Aruba Hotel and Tourism Association (AHATA), Comerciantenan Uni Aruba (CUA) y San Nicolas Business Association (SNBA).
Durante e reunion a presenta e cuater proyectonan di reforma economico: 1. Aceleracion y mehoracion di proceso di permiso; 2. One-stop-shop digital; 3. Implementacion di Aruba Fair Trade Authority; y 4. Habri cuenta di banco di manera mas eficiente. Director di Economisch Bureau Amsterdam (EBA) señor Koert van Buiren, a presenta e resultadonan di e investigacion haci y hunto cu e recomendacionnan di e cuater proyectonan prioritario.
Minister Wever a menciona cu Gobierno a indica cu lo duna mas atencion comercial na San Nicolaas. Pesey, symbolicamente a haci invitacion na e comunidad comercial pa bini hunto na Nicolaas Store na San Nicolaas pa presentacion di e proyectonan pa mehoracion di e clima empresarial y clima di inversion na Aruba.
Por menciona cu e miembronan di e directivanan tabata positivo riba e cuater proyectonan presenta. Especialmente e proyectonan di decisionnan pa permisonan, terminonan den cual mester duna contesta riba peticionnan di permiso haci (fatale termijnen) y un “one-stop-shop” virtual pa comerciantenan (proyecto 1 y 2), tin e interes di sector priva.
Door cu den pasado hopi plannan no a wordo implementa, tin un preocupacion cerca miembronan di e directivanan. Minister Geoffrey Wever ta indica cu e implementacion di e proyectonan tin un “governance structure” pa encarga di guia y monitorea e implementacion.
Awe por a wak cu tin sosten di sector priva pa e proyectonan aki”, Minister Wever ta subraya. “Door di splica con e “governance structure” ta funciona pa guia y monitorea e implementacion y door di informa cu e implementacion a cuminsa caba, ta spera cu esaki ta duna confiansa na e comunidad empresarial cu e biaha aki si implementacion lo tuma luga.
