Entrante 1 di augustus a drenta e prome fase di maneho nobo pa loke ta trata e uitzendbureau. E cambionan cu esaki ta encera lo trece mas consecuencia pa uitzendbureau cu ta hunga ‘wega’, segun e Minister, y tambe lo duna autoridadnan mas poder pa sanciona abuso. E mandatario lo bay den dialogo pa por contesta con largo ta posibel pa tene un trahado como contratista.

Minister di Asunto Social y Labor Glenbert Croes (MEP) a splica durante un conferencia di prensa pa locual ta trata e prome fase di e cambio. “Nos a hisa criteria, regla mas skerpi y estricto pa e comision cu ta bay evalua e diferente peticion.”

E meta ta pa yega na un maneho unda autoridadnan y inspeccion por tuma mas accion y impone mas sancion contra dunado di trabou cu no ta cumpli cu loke ta stipula den e condicionnan di nan permiso pa opera un uitzendbureau.

“Nos ley mester duna nos autoridad pa tuma accion, sancion y boet contra e compania di uitzendbureau cu ta viola derecho di trahado”, e minister a bisa.

Gobierno ta na altura cu tin situacionnan unda ta purba bira e reglanan di uitzendbureau, unda por ehempel tin cierto hotel cu ta busca trahado externo por medio di e bureaunan aki, mientras cu despues di un un aña den funcion, nan ta dun’e un otro funcion pero ta keda haci e mesun trabou. “E wega ey a caba.”

Segun e mandatario e consecuencia lo bay pa uitzenbureau pero tambe pa e dunado di trabou pa viola derecho di trahado. E ta bisa cu violacion ta tuma luga den tur sector, cu tin compania cu no ta contratista pero ta haci trabou di uitzendbureau. Pa esey tambe lo tin consecuencia.

“Nos tin e forma con pa duna boet, ta wardando e conseho final pa mehora di forma efectivo con mester actua. Tin 16 compania tin permiso di uitzendbureau, si un permiso a caduca lo evalua di acuerdo cu e maneho nobo”, Croes a splica.

Sinembargo el a bisa cu ta haciendo control severo pa wak unda cu tin contratista cu den realidad no ta un contratista anto eynan lo tin consecuencia y sancion contra nan. Segun e madatario e pregunta ta keda pa cuanto tempo un trahado por keda cu uitzendbureau y no bira empleado vast.

No ta sigur ainda con largo por wanta un trahado como contratista

“Bo por keda tene un trahado aña tras aña na un uitzendbureau, nunca ta haya contract y no tin bida pa bay banco y busca un lening pa cumpra cas y auto. Su trabou na uitzendbureau mester ta transitorio. Nos ta bay den dialogo tripartidista social laboral, pa haya sector comercial y sindicato, pa tur hunto contesta e preguntanan aki.”

Pa traha cu un uitzendbureau ta pa despues e persona haya un trabou vast, comercio ta bisa cu ta compronde y duna oportunidad pa screen trahado cu ta traha bon y si tin abuso di sistema ta tuma luga.

Un ehempel cu e mandatario a menciona ta cu un hotel a laga su HR (recurso humano) lanta su mesun compania di uitzendbureau na e mesun hotel: ‘Esey ta wega cu tin’. Nan kier duna henter comunidad empresarial un oportunidad pa coregi.

Pa finalisa el a bisa cu esun cu no cumpli cu e maneho nobo lo sufri consecuencia. E meta mas grandi cu derecho di trahado tin perspectiva y ta spera cu ta uni como comunidad, sector empresarial y sindicato pa un miho futuro pa tur hende na Aruba.