Un departamento bou cuerpo policial a wordo crea pa specificamente pa trata asuntonan relaciona cu turismo lo ataca entre otro e problema di bendemento di droga riba beachnan na area hotelero, segun minister di siguridad.
E problema cu bendemento di droga riba beach ta un asunto cu nos a yega di publica riba dje den pasado. Ultimo cu nos a publica tabata despues di un conferencia di prensa di e Task Force Beach Policy cu a wordo institui recien pa gobierno. Pero durante e conferencia aki no a haya ningun claridad riba e maneho con lo bay trata e bendemento di droga cu ta tuma luga den area di hotel, unda no tin visibilidad riba beachnan, segun Gino Winklaar, district chef na warda di Noord.
Durante e conferencia aki sr. Winklaar no a reconoce cu e problema ta tuma luga mirando cu ‘nos na cuerpo policial ta traha a base di echo y e pregunta aki ta basa riba insinuacion cu ta tendi via via’. Sinembargo colega di prensa a subraya cu te hasta algun general managernan di hotel a yega di declara nan frustracion cu e manera con ta bende droga riba e beachnan.
E tema a resurgi durante un conferencia di prensa di gobierno unda mandatario di husticia, siguridad y integracion Andin Bikker (POR) a contesta preguntanan dirigi na e mandatario despues cu oyentenan di Hits100 FM a raporta bendemento di droga den area di high rise hotel ‘cu niun polis den bista’.
E dificultad cu tin pa pone polis den area di hotel segun sr. Winklaar a indica anteriormente ta cu e hotelnan ta blokia visibilidad di e area pa polis, cual tambe a baha despues di añanan. E grupo di polis disponibel pa tarea di tira bista riba area di hotel a keda na mita di loke tabata anteriormente, sr. Winklaar a indica den pasado.
Polis orienta riba turismo
Sr. Bikker tumando nota di esaki a expresa cu nan a haci un sondeo den comunidad, entre otro cerca dirigente di hotelnan pa asina haya sa kico ta puntonan cu mester mehora pa nan. Durante e consultanan a bin ta constata cu hopi turistanan ta informa e hotelnan cu personanan riba beach ta acerca e turistanan pa ofrece nan ‘cosnan ilicito’.
P’esey e mandatario a splica cu lo bin cu polisnan bou un departamento di cuerpo policial cu lo trata specificamente cu e dimension di turismo. E tourism-oriented policing (TOPS) cu e mandatario a referi na dje ta similar na loke ya caba tin den departamentonan di Cuerpo Policial, pero e intencion lo ta pa reunifica esfuersonan y reforsa e departamento aki tambe.
“Tin actualmente strandpolitie pero tambe akinan na Playa tin un departamento chikito den e mall cu ta atende cu asuntonan di turismo. E intencion ta pa crea un departamento unda por enfoca riba tira bista pa loke ta trata turismo na Playa y den area High Rise.”
E departamento aki lo bay atende cu asuntonan di turismo, cual entre otro ta encera percura cu turistanan no wordo molestia cu bendemento di substancia ilicito, sr. Bikker ta conclui.
