E siman aki, minister demisionario di Turismo, Dangui Oduber a anuncia cu despues di a completa fase 1 y 2, y cu fase tres den pleno ehecucion, ta bay cuminsa cu fase cuatro di e proyecto di Boardwalk Malmok, cu ta cay den area dilanti Fisherman’s Hut.
Minister demisionario di Turismo, Dangui Oduber (MEP), den e periodo di su gobernacion tabata hiba un maneho di turismo dirigi entre otro, riba e mehoracion y proteccion di producto Aruba, segun un comunicado di gobierno.
Durante e periodo aki a institui un comision di infrastructura cu tabata discuti y percura pa duna guia na diferente proyectonan riba e bienestar y proteccion di nos recurso. Manera ta conoci, un di nos isla su producto principal ta nos beachnan den cual mester wordo protegi.
E comision aki tabata consisti di e Ministerio di Turismo, DIP, DOW, ATA y TPEF. Adicional tambe APA y AAA tabata asisti ora cu tabata tin mester di experticio specifico. Ta un gran cantidad di proyectonan pa mehoracion di infrastructura, upgrading y beautification cu a wordo ehecuta y cu lo sigui wordo ehecuta e aña aki.
E proyecto di Boardwalk Malmok a wordo parti den diferente fase. Fase 1 y 2 ya caba a wordo entrega algun tempo atras y a resulta di ta un proyecto cu miles di local y tambe turista ta haci uso di dje pa ehercicio diariamente.
Actualmente Boardwalk Fase 3 ta den pleno ehecucion y awo Minister Demisionario Oduber ta contento di anuncia cu Fase 4 ta bay start. Boardwalk fase 4, ta cai den e area dilanti Fisherman’s Hut, cual ta encera:
Restructuracion di e parkeo;
Lo sigui amplia e boardwalk te cu Ritz Carlton;
Lo añadi un localidad nobo di bus stop ;
Lo añadi turtle wall pa asina limita vehiculo motorisa riba beach ;
Lo brinda mas vegetacion natural den e area.
E siguiente fase di e area aki tabata pa bin cu un estudio pa identifica, con pa restructura e forma cu botonan ta baha/subi, ya cu actualmente e manera no ta uno cu ta den un forma balansa cu medio ambiente.
Minister Demisionario Oduber ta contento cu un otro bunita proyecto cual e ta laga atras, lo wordo cristalisa y asina keda eleva producto Aruba.
