Recientemente minister demisionario di Finanzas, Xiomara Maduro, a publica un declaracion riba su pagina di Facebook oficial den cual e ta clarifica algun punto cu a ricibi critica relaciona cu e proyecto di edificio nobo di Aduana.

Den su publicacion e mandatario ta splica cu e edificio di Aduana ta un proyecto cu a cuminsa na aña 2016 prome cu Gabinete Wever-Croes a drenta den gobierno. El a sigui splica cu mester a encamina un trayecto largo pa por a haya e tekening di arkitecto pa despues na aña 2021 cera un acuerdo di intencion cu Bohama sigui pa e proceso nobo cu Didam arrest ta trece cune y tambe cambionan den e pintura pa por acomoda e personal di Aduana na un miho manera.

El a sigura cu e proceso tabata uno largo y cu a bay conforme ley, incluyendo proceso di destaho publico y contrato legal. “Esnan interesa pa investiga, ta liber pa haci esey, pasobra como minister mi no a haya ningun sponsor di Bohama, ni di arkitecto y di ningun persona of compania envolvi den e proyecto. Di berdad tin hende cu ta basta frustra den bida y ta keda insisti pa tur dia busca algo pa lastra hende drechi cune,” e mandatario a remarca.

E minister demisionario a pone e publicacion aki despues cu a traves di algun medio a bin critica pa loke ta e proceso indicando cu tabatin faboritismo pa e compania cu a haya e contract y cu e proceso no tabata uno husto.

Den october di 2023 Gobierno di Aruba tabata den corte caminda decision a cay den un conflicto cu tabatin pa e benta di e ex edificio di Aduana na un compania local y e construccion di un edificio nobo pa Aduana.

Decision di corte ta indica cu pais Aruba ta doño di un tereno no desaroya na Barcadera dilanti di e actual edificio di DTI, conoci como Land Aruba, Prome Division, seccion T, number 2555, referi na dje manera ‘Kavel Barcadera’.

Corte a sigui indica cu pais Aruba, debi na e necesidad urgente di vivienda adecuado, ta considera deseabel pa construi un oficina di Aduana nobo riba e tereno di Barcadera. Na 2016 ya caba pais Aruba Pais a ofrece espacio di competencia pa loke ta trata e kavel di Oranjestad, ex edificio di Aduana, pa medio di un procedura di seleccion publico, accesibel pa un y tur, cu criterio, den cual ningun registracion a ser ricibi.

Corte a sigui bisa cu Bohama a haci un proposicion na Pais di Aruba cu, den corto, a encera cu Bohama lo a obtene e parcela di Oranjestad, ex-edificio di Aduana, riba un huur di termino largo y a cambio lo construi un oficina di Aduana nobo pa Pais di Aruba riba e Percela di Barcadera, unda cu e Pais di Aruba y Bohama posteriormente a drenta den consultanan tocante esaki.

Dia 20 di october 2021, Pais Aruba y Bohama a firma un carta di intencion tocante construccion di un oficina di Aduana nobo riba e tereno di Barcadera, cual ta e proyecto di edificio nobo di Aduana’

Despues di e firmamento di e carta di intencion entre Gobierno di Aruba y Bohama, e partidonan a sigui negosha cu otro y a yega na un acuerdo dia 2 di september 2023 na unda e minister di Asuntonan General, Innovacion, Organisacion Gubernamental,, Infrastructura y Planificacion Teritorial, di acuerdo cu e sentencia di Didam di 26 di november 2021, a publica un aviso, den cual pais Pais Aruba tin intencion di huur e parcela di Oranjestad pa duna of bende na e unico candidato serio, esta Bohama.

Otro companianan interesa a indica cu Gobierno di Aruba no a sigui e proceso di escogencia habri y pa e motibo otro compania(nan) cu tabata interesa no a haya un oportunidad husto pa presenta un oferta pa e propiedad en cuestion, esta e parcela na Oranjestad caminda e ex edificio di Aduana ta situa.

Otro compania(nan) a indica cu e compania cu a haya e contrato, esta Bohama, a haya trato preferencial den e proceso y cu no a sigui e reglanan manera debe ser.

Gobierno di Aruba a defende nan decision indicando cu Bohama tabata e unico compania interesa cu a presenta un plan completo cu tabata cumpli cu tur e rekisitonan y e meta principal di gobierno pa e proyecto aki.

Gobierno di Aruba a señala cu Bohama ta presenta un programa cu no usualmente ta desaroya e tereno nobo, e ‘Kavel Barcadera’ y construi un edificio di Aduana nobo e tereno aki y e desaroyo aki ta inclui vivienda, espacio comercial y parkeo cu ta stimula e desaroyo economico pa e area caminda e edificio nobo lo bin.

Pues na final corte a rechasa e demanda di e otro compania y a argumenta cu gobierno di Aruba a cana e caminda corecto y cu e proceso a bay segun ley y no tabatin ningun faboritismo na momento cu nan a otorga e contrato na Bohama.