Minister demisionario di Enseñansa, Armando Rudy Lampe: “Tin cu cumpli cu ley y no ta cuestion di pone SKOA contra muraya”

Comienso di aña escolar aki tabata uno controversial. Un dia prome cu scol habri, SKOA a informa cu den apoyo na e situacion di e trahadonan di limpiesa, nan no lo habri scolnan dia 1 di september.

Bon Dia Aruba a tuma contacto cu minister demisionario di Enseñansa, Ciencia y Desaroyo Sostenibel, Armando ‘Rudy’ Lampe tocante e caso aki, ya cu manera Bon Dia Aruba a indica den su edicion di dia 3 di september ultimo, SKOA no tabatin comunicacion cu Lampe. Esaki pa motibo cu a crea un comision for di januari di e aña aki, hunto cu un mediador y sindicato Seppa, pa asina resolve e situacion di trahadonan di limpiesa.

Lampe ta expresa cu e situacion aki no ta trata di un guera entre minister di Enseñansa cu SKOA, sino cu e situacion aki ta trata di un guera entre SKOA cu ley di Aruba.

“No ta trata cu a mi no kier sinta na mesa. No ta trata cu a mi no kier busca un solucion. No ta trata cu a mi no kier papia cu SKOA. E ta un cuestion conforme ley of no”, Lampe a sigura.

Di mesun manera, el a indica cu e ta para responsabel pa cada begrotin beschrijving cu no ta presupuesta ni aproba pa parlamento, “y ta esey a tuma luga, lamentablemente”. E suma disponibel ta un 1.080.000 florin cu lo coresponde. Pero door cu SKOA, segun rapport di Centrale Accountantsdienst (CAD), a haya pago dobel (dubbele betaling) den pasado, nan a perde nan caso. Lampe a sigura a ricibi dos biaha e cifra di 980 mil florin y tambe el a afirma cu tin prueba unda hues a bisa cu nan mester paga e placa back, y ta p’esey nan a perde e caso.

Segun Lampe e MB (Ministeriële Beschikking) di aña 2015, riba cual SKOA ta basa su argumento, ‘no tabata ni dirigi na SKOA’, sino cu ‘di algun manera a hay’e y duna su propio interpretacion’. Loke ta keda cla den esaki, segun Lampe a indica, ta cu e MB no ta un base legal. Y hues den dos ocasion a duna un pronunciacion riba esaki, cu ta afirma cu esey no ta un base legal pa loke SKOA a haci.

Tambe Lampe a bisa cu tin un escrito di e mesun ex-minister, Michelle Hooyboer, cu no por interpreta e MB comosifuera ta conforme subsidio di salario, sino cu mester paga trahadonan di limpiesa conforme exploitatie subsidieert.
“Nos tin tres ley den Enseñansa cu ta masha cla mes den esey. Bo tin e Landsverordening pa Kleuter Ondewijs, pa Basis Ondewijs, entre otro, y tur ta bisa e mesun mensahe. Nan ta haci un diferencia entre salarissubsidie y exploitatie subsidieert; tur ta specifica cu limpiesa di scol cu ta inclui pago di trahadonan di limpiesa ta cay bao exploitatie subsidieert”, el a comenta.

Ademas, Lampe a bisa cu ni den añanan 2017, 2018 ni 2019 esey tabata presupuesta. E tabata presupuesta e tres miyon florin cu a bay den groot pa cual cu no tabatin aprobacion. Loke ta nifica cu na momento cu e no ta presupuesta, sin permiso di minister e ora ey y sin un base legal, a hinca e trahadonan di limpiesa toch den e sistema di payroll di gobierno conforme status di ambtenaar.

Lampe ta indica cu nan a yega di aloca fondonan adicional, y cu pa e presupuesto di 2021 SKOA lo haya 1.5 miyon adicional di loke otro bestuur di scol ta haya, pa motibo cu “diripiente a aumenta e cantidad di trahadonan limpiesa, mientras cu SKOA tin menos alumno”.

Prome cu 2015, segun el a declara, SKOA tabatin mas alumno y despues e cifra a baha. Pro e cantidad di trahado di limpiesa a redobla y asina mes nan a haya extra pa compensa. “Pasobra a hunga cu sentimento di hende, di e trahadonan di limpiesa. SKOA ta nan doño di trabao, no ta gobierno ta doño di trabao, creando algo cu no ta klop pasobra bo no por haya status di ambtenaar ora bo ta un subsidieert onderwijs. Y nan a bira victima di esey”, Lampe a expresa.

El a afirma cu esaki ta “un situacion doloroso” y ta p’esey nan a duna un compensacion pa e aña aki 2021, y pa aña 2022 nan a papia cu a aumenta e normbedrag, loke ta nifica cu SKOA – cu tin e mayoria di muchanan – ta bay haya mas placa pa exploitatie subsidieert, ta bay tin mas entrada pa por paga e trahadonan di limpiesa.

“Ta p’esey nos a haci un extra esfuerso tambe pa aumenta e normbedrag cu ta referi entre otro na loke ta e exploitatie cost. Kiermen esey ta bay ta cubri pa 2021,” Lampe a señala.

Ademas, el a bisa cu e tin cu cumpli cu ley y no ta cuestion di “pone SKOA contra muraya”. “Tur directiva di scol ta haya e confiansa di gobierno pa por drenta den e sistema di PSA payroll sistem di gobierno” Lampe a finalisa.