Awe den oranan di atardi, minister demisionario di Enseñansa Armando Rudy Lampe a haci un entrega di un keho penal contra SKOA na unda el a sigura cu tin un atraco organisa riba caha di gobierno.
Lampe a menciona cu anteriormente el a haci denuncia di casonan di fraude den institucionnan educativo como por ehemplo Enseñansa pa Empleo y EPB ora el a cuminsa cu e funcion di minister, aworaki cu su periodo ta casi finalisa e ta bin haci un otro denuncia cu ta dirigi contra e rechspersoon di SKOA, contra Directie Onderwijs y funcionarionan cu tin di haber cu e caso aki.
Manera ta conoci, Lampe tin algun lunanan batayando dos caso contra SKOA cu nan a perde den Corte di Husticia pa loke ta trata e trahadonan di limpiesa y cu ta contra ley loke SKOA a haci, el a informa cu e siman aki el a haya un relato cu a wordo haci door di Centrale Accountantsdienst (CAD) cu por a demostra cu for di inicio caba diferente persona a coopera, traha y ehecuta algo cu ta contra ley manera Lampe a menciona.
“Akinan bo tin un atraco organisa riba caha di gobierno y e botin di e atraco a wordo reparti entre hende humilde di trahadonan di limpiesa pero esey no ta kita cu e ta un atraco”, el a sigura.
Ademas, el a bisa cu un persona cu miho intencion na mundo por comete un strafbarfeit pero esey no ta kita cu e persona ta cometiendo e strafbarfeit ey, pa e motibo ey el a bay na oficina di Landsrecherche na unda el a señala cu efectivamente diferente persona a organisa y a plania e acto aki riba caha di gobierno.
Asina mes, e ta lamenta cu Aruba ta hopi leu for di cas pa loke ta trata integridad y cu institucionnan importante no a para banda di minister di Enseñansa pa condena e atraco aki, como por ehemplo prome minister demisionario Evelyn Wever-Croes, ademas di sindicato di trahadonan publico, sindicato di maestro, mediadornan di gobierno, entre otro cu segun el a declara, den un carta cu el a ricibi tabata bisa cu “minister tin falta di madurez” pa motibo cu e no kier aproba e hecho aki.
“Tur tabata na haltura y no kier coregi e situacion aki, al contrario, tabata pone presion riba minister di enseñansa pa mi persona aproba un atraco riba caha di gobierno”, Lampe a bisa.
Lampe tambe a indica cu “mi ta prefera di perde voto y bira impopular, pero no perde mi consenshi, mi ta prefera di ta en berdad un perdedo, pero basta cu mi no perde respet pa placa di pueblo”.
Lampe a comenta cu el a laga e denuncia na Landsrecherche pa esey por continua su procedura, loke ta nifica cu tur e documentacion lo wordo poni den man di Ministerio Publico pa asina nan por investiga e documentonan aki pa lo determina kico lo ta e siguiente pasonan.
El a sigura cu e investigacion por tin tardansa pa motibo cu e mes a expresa cu ora el a haci un denuncia tres aña pasa cu un otro caso, te ainda e investigacion ey no a cuminsa y cu esaki lo por sucede tambe door di falta di personal na Landsrecherche y Ministerio Publico.
Di mesun manera, el a indica cu e pagonan pa trahadonan di limpiesa cu a wordo realisa mester tabata conforme ley y no bou di subsidio di salario cu tambe tin personal di enseñansa cu a cay bou di dje, “e atraco organisa aki cu na e momentonan aki ya caba ta riba 12 miyon florin ta trata di un suma hopi halto”, Lampe a manifesta.
Tambe, el a trece dilanti cu un dia prome di dia di eleccion e director di SKOA, Anuesca Baly a publica riba e red social Facebook varios e-mails sin nomber na unda tabata indica cu algun personanan ta responsabel pa esaki, “e intencion na e momento ey naturalmente tabata pa hurt minister Lampe den eleccion” y cu e personanan ey ta di Directie Onderwijs cu ta cay bou direccion di minister di Enseñansa, pero “sin pensa cu na e momento cu bo a publica esey, mesora Centrale Accountantsdienst a tuma nota y a bisa cu den e publicacion ey, den investigacion cu a tuma luga sea ta SKOA a gaña Centrale Accountantsdienst of ta Directie Onderwijs a gaña Centrale Accountantsdienst den nan investigacion”, el a sigura.
Tur instancia cu ta ricibi placa di pueblo ta haya control di Centrale Accountantsdienst y segun Lampe a expresa, ora nan a cuminsa cu un investigacion y ora nan a bin haci preguntanan, e personanan ey a sconde informacion pa Centrale Accountantsdienst.
Pa e motibo ey, Lampe a menciona cu e siman aki y awe tardi e proceso a wordo cera, Centrale Accountantsdienst a entrega pa su persona como minister di Enseñansa e process verbal di e investigacion cu nan a haci e siman aki cu ta follow up riba e publicacion di director di SKOA, asina mes el a afirma cu nan a investiga varios persona entre nan e mesun director di SKOA y trahadonan di Directie Onderwijs na unda eynan “a basha abou” segun Lampe a bisa, cu en berdad nan a obstrui e investigacion di Centrale Accountantsdienst.
Ta p’esey cu ayera mes despues di ricibi e process verbal el a dirigi na Landsrecherche pa haci e denuncia como minister di Enseñansa, pa via cu den su funcion e ta califica pa tin tur e documentacion ey y no como ciudadano, por lo tanto, no ta su persona esun cu lo tuma e siguiente paso sino su sucesor, esun cu lo wordo nombra como minister di Enseñansa pa e proximo gobierno cu lo wordo forma den proximo dianan.
Bon Dia Aruba tambe a tuma contacto cu director di SKOA, Anuesca Baly pa asina por duna e otro banda di e medaya pero redactor no por a logra haya un contesta di su persona.
