Segun minister demisionario di Enseñansa, Ciencia y Desaroyo Sostenibel Armando Rudy Lampe a sigura den un conferencia di prensa di partido RED ayera atardi, e no ta bay rectifica riba e declaracion cu el a haci dianan pasa den cual el a referi na SKOA.
Manera Bon Dia Aruba a publica ayera, SKOA a pidi un rectificacion tanto di Lampe como pdi partido RED, pa motibo cu segun SKOA, nan a wordo acusa sin base pa loke ta trata actonan ilegal di maneho di personal, specificamente di trahadonan di limpiesa.
Pa cu esaki, Lampe a señala cu e no tin ni un motibo pa haci un rectificacion, pa motibo cu loke el a trece dilanti ta un sentencia di hues. “Ami no a inventa nada”, el bisa, y a sigura cu e sentencia ta bisa cu trahadonan di SKOA a wordo tuma na trabao contra ley.
Lampe a indica cu den relato financiero di SKOA mes nan a afirma cu nan no por cumpli cu nan obligacionnan fiscal na pais Aruba, pa motibo cu nan tin un debe miyonario. “Tur hende por verifica loke a mi a trece dilanti y pa tal motibo, mi no tin ningun rason pa rectifica”, Lampe a finalisa.
Igualmente, Kinsasha Thielman como presidente di partido tambe a expresa cu di nan banda como partido mes tampoco nan no lo wordo rectifica y cu nan no lo wordo teni responsabel pa declaracionnan di Lampe.
“Nos ta bisa SKOA cu di nos banda no ta bin rectificacion y si lo mester bay mas leu lo tin e prueba pa funda e argumentonan aki” el a finalisa.
