E echo cu nos Palm Beach ta aparece den e prome luga riba un lista di shete beach mas druk cu e bishitantenan mester evita di bay si nan kier disfruta di un rato trankil, ta un promocion nada agradabel pa nos turismo. Segun e minister encarga e causa ta turistanan crucero.
E lista aki a keda divulga pa e website specialisa: www.oyster.com siman pasa. Riba e asunto aki, minister di Turismo, Mike de Meza a declara na Bon Dia Aruba, cu e sobre populacion riba e beach ta algo cu ta wordo causa netamente ora cu e barconan crucero ya yega nos isla. Cada barco tin entre 3 mil pa 4 mil turista crucero riba dje, caminda un cantidad grandi di nan ta bay pa drumi y disfruta di nos beach. “Esey ta causa nos por yam’e un sobre populacion na e momento ey cu ta pa un dia.” E ta un situacion cu ta presenta dos pa tres biaha den un siman ya cu esaki ta depende di e agenda di bishita di diferente crucero cu ta bishita nos isla. E mandatario ta haya un lastima cu historicamente niun gobierno, politiconan y ministernan, no a duna atencion na e parti ey. E drukmento aki riba beach ta algo cu gobierno ta studiando actualmente con nan ta bay deal cu e situacion aki. “Nos ta bay tene consideracion cu esey sigur. Nos tin cu bay drecha nos beachnan. Nos tin cu bay amplia nan sigur pa nos local mes, pero tambe pa turistanan cu ta keda bin Aruba.” E mandatario a sigura cu e problema cu a surgi pa tanto drukmento riba nos beach tin su debido atencion. Den e caso aki nos mester tanto di e turistanan, pero e turistanan cu ta contribui mas na nos economia ta esun cu ta yama e “stay over tourist” cu ta keda pa algun dia den hotel y cu ta gasta placa. E ta haya cu e turista crucero cu ta bin drumi riba beach hopi biaha no ta contribui mucho na nos economia.
Sr. De Meza ta bisa cu nan lo analisa con nan lo por crea facilidadnan di nos beachnan cu nos lo por atende cu tur turista. Pero na mesun momento nan tin cu bay wak con nos pais lo por saca bek e probecho economico di e turistanan crucero cu ta “bin baha bay beach y drumi riba beach y bay bek.”
CONSTRUCCION DI MAS HOTEL Y CONDOMINIO
Otro aspecto cu nos a trece cerca minister de Meza tin di haber e construccion di mas condominio den e area aki. Ya caba nan a cuminsa prepara tereno mas uno mas patras di Amsterdam Menor, ademas di e hotelnan low-rise cu tin den e zona aki. Un noticia tambe a sali den e fuente di Corsou, Antilliaans Dagblad cu lo construi mas cu 4000 camber. Sinembargo esaki no ta nada nobo y ya for di comienso e minister di Turismo e tempo ey, Otmar Oduber, a indica cu esaki ta e plan.
Awor cu nos a haci e pregunta atrobe, minister De Meza a sali na defensa di su colega di Infrastructura Benny Sevinger, ya cu e ta haya cu acusacion ta wordo manda den su direccion. Pero nan tin pensa di traha un lista pa mustra publicamente cu tipo di hotelnan of condominionan a wordo duna durante e ultimo 7 pa 8 añanan. Pero tambe kico a wordo duna caba prome cu e dos ultimo gobernacion aki di gabinete Mike Eman. “Mi por garantisa bo cu no tin niun hotel traha durante e gobernacion di Mike Eman I cu II.” Pero despues e mandatario ta admiti cu si tin un hotel cu wordo traha awor banda di aeropuerto cual su groundbreaking lo ta diabierna awor. Tambe e ta bisa: “Tabatin minister anterior cu tabata bezig cu e posibilidad di un hotel na Isla di Oro, y bo tin expansion di hotel nobo cu e tabata bezig cu ne na Tierra del Sol.” El a agrega cu nan ta un expansion cu ta nifica un cantidad di camber cu nan tin cu bay evalua ainda.
Pero algun di e proyectonan menciona anteriormente no ta den construccion. E a reitera cu un solo hotel so ta wordo construi durante e dos gobernacion aki, pero si tabatin condominionan cu a wordo lanta. Sinembargo e minister ta laga sa cu e condominio aki ta a base di permisonan cu a wordo otorga prome cu nan a drenta gobierno. P’esey nan kier bin cu e lista pa mustra kico ta e situacion na Aruba pa trece mas claridad.
MORATORIO
Esaki ta algo cu e minister anterior Oduber tambe a vocifera na januari 2014 ora di lansa e maneho di turismo di gabinete Mike Eman I. El a indica cu no por bringa e decisionnan tuma caba durante e gobernacion anterior (di MEP). Den sentido esey lo a costa gobierno hopi placa. El a indica na e momento ey tambe cu e moratorio primi pa hopi tempo durante diferente gobernacionnan di diferente partidonan (AVP y MEP), lo bay bin na juni e aña ey (2014) Sinembargo esaki nunca a pasa y despues den un entrevista e minister a indica cu mester crece pa motibo cu asina nos economia tambe por sigui crece. “Pasobra si esey no ta e caso, y hende no ta haya trabou, of hasta perde, nan tambe ta tira culpa riba nos.”, asina sr Oduber a declara e tempo ey.
