ORANJESTAD –  Minister Mike de  Meza a referi na e rapport di Caft cu a indica cu e pronosticonan di gobierno ta irealistico pa cu e proyecto di refineria. Sinembargo e minister ta comenta cu Citgo ta cumpliendo cu nan compromisonan. Y cu hende mester un tiki pasenshi awor. Tambe e banco AIB ta haci un estudio pa midi e efectonan economico.

Gobierno a pidi e banco di inversion pa haci un estudio mas profundo riba e efectonan di e reapertura riba nos economia. Nan ta spera di haya e rapport e siman aki ainda. E mandatario ta bisa cu e placa cu Citgo ta paga na gobierno cu ta casi 20 miyon florin na belasting ta wordo paga debidamente. For di october ultimo Citgo ta cumpliendo den forma proporcional cu e pago di e compromiso aki mensualmente; y tambe cu e parti di grondbelasting cu conhuntamente ta cera e buraco financiero di 20 miyon florin cu CAft a referi na dje, segun de Meza.

“E ta wordo paga. Si e refineria ta den operacion of no, si tin trabou of no, esey ta wordo paga.” E minister  ta bisa cu e trabou di rehabilitacion mester tuma luga den un forma safe, tanto pa e trahadonan y tambe pa e bisindario. Pero safe tambe pa e planta cu mester ta bon drecha ora cu e ta drenta den  operacion. E ta laga sa cu na final tur e proyectonan ta canando. El a pidi tur hende cu tin pregunta riba ki dia e trabou di e refineria lo ta full swing, pa nan tin un tiki pasenshi.

Otro suma casi similar tin di haber cu e lease di e refineria na RdA (Refineria di Aruba) cu ta un compania estatal , y cu Citgo ta pagando normalmente. Unabes cu e refineria lo drenta den operacion di rehabilitacion su contribucion pa e parti laboral tambe lo trece un contribucion “grandi” pa economia di Aruba, segun sr. De Meza. Ya cu e hendenan cu lo traha lo yuda move nos economia y tambe su contribucion pa cu  belasting; mesun cos tambe ta conta pa e companianan contratista.

E ta kere cu CAft ta haci su analisis y ta na nan pa cuestiona loke nan kier cuestiona, “pero nos ta haci nos trabou.” Tambe e ta agrega cu  gobierno durante e dos añanan cu nan ta wordo escrudiña door di Caft, a cumpli cabalmente cu nan presupuesto; y nan pronosticonan. Tampoco e aña e no ta mira ningun diferencia. A base di nan evaluacion nan ta premira cu e aña aki lo haya e piek caminda lo tin alrededor di 2 mil pa 2500 hende cu lo bay traha den e refineria loke ta genera entrada pa gobierno.  E ta añadi cu den nan pronostico e cifranan cu nan ta uza ta relativamente conservativo. E ta haya cu si tin pregunta di parti di CAft riba e asunto aki, sigur gobierno lo splica nan. Nan ta sigur tambe cu na fin di dia nan pronostico of analisis lo keda proba pa cu fin di aña con esaki lo refleha den entrada pa cu gobierno.

PASENSHI
For di luna di october ultimo cu Citgo a bira operador nobo di e refineria a transcuri tres luna y mey, y ya caba un cantidad di hende a wordo entrevista. Tambe tin algun di nan cu a wordo contrata caba pa haci inspeccion y defini e diferente trabounan y prepara e fase cu ta bay defini tur e trabou mes. Unabes cu ta wordo defini e trabounan nan lo drenta den e fase grandi durante e periodo mes di rehabilitacion di e refineria cu ta uno  sumamente grandi, segun e mandatario. E ta agrega cu e fase inicial di inspeccion y definicion di e trabounan ta canando den un speed relativamente lihe; y e ta priminti cu denter di pronto nos lo por wak mas actividad den refineria, ya cu gobierno di Aruba lo keda insisti pa esaki tuma luga mas pronto cu ta posibel.

TRAHADO DI AFO
“Nos sa cu tin hopi local cu ta wardando pa e fase ey cuminsa pa nan tambe por cuminsa laboral den e industria cu nan a traha semper den dje”.  El a reitera cu compania local y trahadonan local ta esun prome yama cu tin cu bay haci e gran cantidad di trabou. Pero e ta laga sa cu exportacion di trahado di afo ta inevitabel, ya cu nos pais tin un base limita di personanan cu a yega di traha den e refineria. E base aki ta entre 800 pa 1300 hende,  mientras lo yega un momento den e proceso di rehabilitacion cu lo mester entre 2500 pa 3 mil hende pa por caba e trabou entre 2 pa 4 aña. Tin espacio laboral no solamente pa e trahadonan cu experiencia sino pa e hobennan cu a caba scol tecnico y nos hobennan cu ta studiando afo cu por bin traha como ingeniero of tecniconan.