No solamente gobierno di Aruba ta envolvi den e negociacion cu Citgo pa reapertura di e refineria na San Nicolas. Minister di Energia, sr. Mike de Meza a declara cu tanto gobierno di Venezuela, gobierno di Hulanda, gobierno di Aruba, Citgo, PDVSA, ta envolvi den e negociacion aki. Den poco palabra e mandatario a bisa: “Tur hende ta envolvi!”
El a laga sa cu nan a realisa un trabou completo y tin reglanan contempla den e proceso di negociacion aki. E ta un negociacion serio cu ta envolvi hopi institucion y paisnan cu ta demanda pa traha a base di un plan y logistica, caminda cada ken tin su prioridadnan.
Firma acuerdo final
Ainda no tin un fecha defini pa e acto di firma di e acuerdo final; pero e minister a bisa na Bon Dia Aruba cu e ta premira cu denter di un siman of dos siman, esaki eventualmente lo tuma luga. “E por ta cualkier momento. Warda nos ta wardando riba nan”, el a bisa.
E mandatario a declara cu ainda nan mester haya otro pa e fecha cu nan ta bay sinta hunto pa e ceremonia di acto di firma di e acuerdo final, den cuadro di reapertura di e refineria.
Minister de Meza a declara na Bon Dia Aruba cu e situacion politico interno di Venezuela no tin nada di haber cu e proceso di negociacion cu nan ta bin realisando y finalisando. Encuanto si e situacion politico di Venezuela lo por afecta e firmamento final cu Citgo subsidia dor di PDVSA, minister de Meza a bisa: “No, mi no ta kere cu esey”.
E mandatario a abstene di duna declaracion ya cu e ta considera cu e parti interno di Venezuela y su efecto “por ta” pa e refineria, esaki ta un tema cu e ta laga pa Venezuela mes.
“Mi ta kere cu nos no tin espacio. Y nos no tin autoridad pa nos ta bay dicidi kico ta bon y kico ta malo. Ki ora si y ki ora no. E ta un asunto interno di Venezuela y pa e gobernante interno di e pais ey”, el a declara na Bon Dia Aruba. El a afirma cu e ta prefera di abstene di bay involucra den esey.
Asunto interno di Venezuela
Encuanto informacion produci na Venezuela rond di e negociacion di Citgo pa opera e refineria na Aruba cuestionamento a bin acerca cu un acuerdo asina ta demanda un fiansa grandi pa Citgo, cu ta un compania Mericano pero subsidia pa PDVSA di Venezuela, lo por inicia cu e proceso di reapertura di e refineria na San Nicolas.
Sinembargo a wordo cuestiona e echo cu e asunto aki no a wordo trata den Asamblea Nacional. Minister de Meza no ta kere cu esaki lo bira un strobamento pa stanca e proceso. Sinembargo e ta haya cu “procedura cu tin cu cana na Venezuela esun miho cu por contesta bo esey ta e gobierno di Venezuela, Citgo of PDVSA”.
Minister de Meza a agrega cu nos no tin niun autoridad pa duna niun instruccion, ya cu nan ta esunnan cu tin cu cana e caminda ey. Si e situacion interno politicamente papiando lo por afecta e firma di e acuerdo final entre nos pais y Citgo, dificilmente minister de Meza lo por sigura esey.
“Locual ta pasa na Venezuela mi ta laga esey na gobernantenan di Venezuela pa contesta…”, segun nos minister di Energia.
Na final minister de Meza a indica cu no ta husto cu for di Aruba nos duna tur sorto di remarcanan cu ta parti di Venezuela su relacion internamente. E no ta kere cu esey ta “eticamente corecto y si mi ta haci’e, specula mi ta specula. Esey mi tin cu laga pa nan mes…”
