E prome 9 luna di aña pa Turismo ta un exito total. Aruba su Turismo a aumenta cuy 5.7% y entrada pa camber a conoce un aumento di 8.4%.

Segun un comunicado di gobierno, pa loke ta trata e prome 3 luna nan di aña Turismo a contribui 1.094.1 miyon florin na nos economia, es decir mas cu 1 biyon florin.

Minister di Turismo, Dangui Oduber ta sumamente satisfecho cu e resultadonan y indicadornan den Turismo pa loke ta trata e prome 9 luna nan di aña 2019. A base continuo Oficina di Turismo di Aruba (A.T.A.) ta registra y analisa e estadisticanan referente nos industria turistico y ta raporta esakinan.

Debi na cambio den e sistema di nos departamento di inmigracion RADEX (cu ta registra tur bishitante cu ta drenta y sali for di Aruba) cual fin di aña 2018 a wordo modernisa na un programa mas avansa, a experiencia un tardansa inespera pa cu e reportahe di e cifranan mensual. Di parti di A.T.A. ta gradici IASA pa e colaboracion extenso y ta contento di mira adelanto pa asina por ‘get back on track’ den e proximo dianan / lunanan.

Di acuerdo cu e cifranan di IASA (Inmigracion di Aruba), Aruba a yama bonbini na un total di 855.734 bishitante ‘stay-over’ durante e prome 9 luna di 2019. Esaki ta 5.7% (+46.408 turista) mas compara cu e mesun temporada pa 2018. ATA ta anticipa cu aña 2019 lo cera cu un crecemento di 3.6%.

Durante periodo di januari pa september 2019, 555.525 pasahero crucero a bishita nos destinacion riba un total di 207 diferente barco crucero. Compara cu e mesun temporada di aña pasa, turismo crucero a baha cu 2.2% (-12.736 turista). Di e resultadonan di januari pa september ta indica cu aña 2019 lo termina cu alrededor di 815.000 pasahero crucero. Esaki ta aproximadamente e mesun cantidad cu a bishita Aruba durante 2018.

Contribucion na economia segun Tourism Credits / Banco Central.
Di acuerdo cu Banco Central, e asina yama ‘Tourism Credits’ (anteriormente ‘Tourism Receipts’) pa 2018 a contribui cu Afl 3.569 miyon den nos economia, cu ta un aumento di 7.5% compara cu 2017. Pa e prome kwartaal di 2019, Tourism Credits a contribui cu Afl 1.094.1 miyon, cu ta un aumento di 3.1% compara cu 2018. Industria di turismo pa Aruba ta mustra un aumento consistente durante periodo 2011-2018. Pa 2019, ta proyecta cu aña lo cera cu un crecemento entre 4% pa 6%.

Segun Aruba Hotel and Tourism Association, di januari 2019 te cu september 2019, e ‘Average Daily Rate’ (ADR) a aumenta cu 6.8% compara cu e mesun temporada na 2018. Esaki den cifra ta US$ 260.67 na 2018 compara cu US$ 278.50 pa 2019. E entrada pa camber disponibel, e asina yama RevPAR a aumenta cu 8.4% di US$ 220.14 (januari te cu september 2018) pa US$ 238.70 pa e prome 9 luna di 2019.

E anochinan ocupa (ORN) pa camber a aumenta cu 2.8%. E ocupacion den nos hotelnan tabata 86.6%, esun mas halto den Caribe. Aki ta proyecta pa 2019 un crecemento entre 5% pa 6%

E cifranan di AHATA ta basa riba 17 propiedad, cu excepcion di Hilton Aruba Caribbean Resort & Casino.

Oficina di Turismo alabes ta contento cu esfuersonan strategico di demas partnernan manera Aruba Airport Authority NV, Aruba Ports Authority N.V., Aruba Hotel And Tourism Association y Aruba TimeShare Association ta duna nan fruto.