Diahuebs anochi na Tierra del Sol den un bon ambiente TPEF a lansa su website pa prome biaha den historia. Esaki a sosode den presencia di nos Minister-President sra. Evelyn Wever-Croes, Minister Dangui Oduber, demas coleganan Minister, Parlamentarionan, Board di TPEF y demas stakeholders di e industria turistico.
E website aki ta sigui mustra Minister Oduber su maneho caminda tur caminda ta conociendo innovacion atraves di tecnologia.
TPEF a keda funda na aña 2010, e ta un fondo cu a wordo traha cu e proposito pa inverti den proyectonan cu ta contribui na e mehoracion di e producto turistico di Aruba. E portfolio den cual TPEF ta inverti den proyectonan ta consisti di 6 categoria. Esakinan ta: Atraccion, Seguridad, Medio Ambiente, Herencia, Conscientisacion y Inversion.
TPEF semper a traha a base di e sistema di “Good Corporate Governance”. Desde cu TPEF a wordo funda y specialmente den e ultimo 5 añanan e organisacion a logra realisa masha hopi proyecto atraves di Ministerio di Turismo. Proyectonan mas notabel di TPEF ta entre otro e Boardwalk na Malmok, trapi y hut na Hooiberg, e pier na Rodgers Beach, e mantecion di nos costa limpi, campaña Stimami Steralisami pa menciona algun.
Awor cu e Website nobo, www.tpef.aw tur hende por mira tur e proyectonan cu TPEF a realisa. Esnan cu tin un idea cu nan kier realisa y mester di fondo por haci un peticion pa esaki riba e pagina web mes. Claro semper y cuando esaki ta den e portfolio di 6 categoria ya caba menciona. Riba e pagina web lo por haya tur informacion y pa pregunta por contacta e personanan indica eynan mes tambe.
Minister Dangui Oduber a keda masha impresiona con e website a keda, e mandatario ta sigur cu e lo bay facilita henter e proceso pa yega na e fondo di TPEF. Finalmente Minister Oduber ta felicita henter e board di TPEF encabesa pa sr. Mario Arends. Un danki special na sra. Sharlyze Romano cu ta Project Manager di TPEF cu e bunita logro historico aki.
Turismo ta keda e driver di nos economia y pesey ta importante pa nos keda inverti den e mehoracion di nos Producto Aruba.
