Durante un conferencia di prensa cu Minister di Salud, Deporte y Turismo, Dangui Oduber a ofrece diahuebs pasa, el a informa cu luna di september el a ricibi e resultadonan di e performance di hotelnan, cu a resulta un luna hopi positivo compara cu aña pasa.

El a bisa cu aña 2018 por wordo considera como un di e miho aña di turismo pa pais. Tur indicador ta señala cu e cantidad di bishitante a subi, como tambe e cantidad di bishitante na crucero, REVPAR ta bisa cu e cantidad di turista a aumenta na dobel digits. Di mesun manera minister a recorda cu e aña aki e turismo a perde e mercado Venezolano, cu tabata e di dos mercado mas grandi pa turismo, pa motibo cu tabata turistanan cu tabata bin na isla pa gasta placa den e economia. Pero debi na situacion di e pais bisiña, turismo a perde e mercado ey y mercado Americano a mustra un aumento di 10% na 2018.

Di e mercado Americano aki, Oduber a splica cu nan a laga un cifra di 400 miyon florin extra den economia. Na 2019 e indicador ta señala cu no bayendo diferente. Pa loke ta trata luna di september, tabatin un grado di ocupacion di 78,3% loke ta nifica un aumento di 4,2% den comparacion cu september di aña pasa.

Tocante esaki, tambe el a bisa cu e REVPAR a conoce un aumento di 10% yegando na e cifra di 165,73 dollar, e ‘year to day’ di e prome nuebe luna di aña te cu final di september. E grado di ocupacion a yega na un averahe di 85,7% loke ta indica cu ainda turismo ta keda como e base principal di economia di e isla.

Di otro banda, loke ta trata proyectonan di turismo, Oduber a destaca cu manera Gobierno a anuncia, varios proyecto ta bin pa por sigui mantene e isla como un di e principal atractivo turistico di e region.

Di esaki, algun di nan ta canando y otro no a cuminsa ainda. Pa loke ta trata e proyecto di Bushiri, Oduber a splica cu e fase uno ta cla y esaki ta un proyecto cu a wordo parti den dos fase. E prome tabata e ponemento di e santo blanco pa asina percura pa tin un beach adicional pa comunidad y e fase dos lo cuminsa e aña 2020 y lo bira un embeyecemento di e area ey pa crea espacio pa parkeo, algun cafe y kiosco y drecha e beach pa por ta accesibel pa e comunidad.

Asina mes, Oduber a declara cu e ‘board walk’ na Malmok ta casi cla. Den luna di november mester entrega por completo. E fase dos cu na e momentonan aki ta den proceso di destaho.

E proyecto di drechamento di pier na Rodgers Beach tambe lo wordo cuminsa e aña aki y e proyecto di Baby Beach a haya algun contratiempo. DOW mester bay sinta na mesa cu contratista pa negosha un miho prijs, pa motibo cu e destaho a tuma luga cu cinco compania cu a busca informacion pa participa den esaki, pero un compania so a entrega un proposicion ofreciendo un cifra cu tabata adapta pa e presupuesto.

Ademas, Oduber a menciona e proyecto di Port City, Gobierno ta den combersacion cu DIP y DOW pa inicia e proceso di midi tereno cu tin den plan e creacion di un boutique hotel cu centro di convencion, linear pak y board walk. Esaki ta un proyecto di inversion priva cu un cifra di mas di 500 miyon dollar cu un duracion di 10 aña, esey kiermen cu Gobierno mes no lo inverti den esaki.

Pa finalisa, el a menciona Gateway 2030, cu ta trata e renobacion y ampliacion di aeropuerto cu un inversion di 275 miyon dollar. Na e momentonan aki e proceso di destaho a cuminsa caba, tres compania a participa den esaki y e proyecto lo mester cuminsa na aña 2020 .