Pa señala e siguiente capitulo di e campaña di conscientisacion ‘Ami Ta Turismo’, Sra. Tisa LaSorte, Presidente y CEO di AHATA a presenta Minister di Turismo y Salubridad Publico, Sr. Dangui Oduber un t-shirt promocional cu e logo di e campaña.
Durante e encuentro a conversa tocante e retonan den Aruba su turismo, incluyendo cu den comunidad tin falta di conocemento pa e variedad di carera atractivo cu ta posibel den e sector. Segun Minister Oduber, “AHATA su iniciativa di Ami Ta Turismo ta necesario pa sigui motiva, inspira y conscientisa nos comunidad di e oportunidad cu turismo ta ofrece pa nos hendenan.”
Serie 2 di ‘Ami Ta Turismo’ ta lansa Diabierna riba AHATA su plataformanan social. Lo introduci un diferente “embahador”cada dia cu ta papia orguyosamente di su trabao den turismo, cu e meta pa illustra e pasion di diferente persona dedica den e industria. Den e temporada aki, AHATA lo distribui un cantidad limita di t-shirt promocional na varios empleado den sector turistico.
Pa conoce cada embahador y su funcion den turismo por sigui AHATA su pagina di Facebook: https://www.facebook.com/arubahotelandtourismassociation
