Minister di Deporte, Dangui Oduber ta rabia cu Canadian Bank Note Company y tambe cu Fundacion Lotto pa Deporte.

E disgusto di e mandatario tin di haci cu Canadian Bank Note Company no ta cumpliendo cu e suma cu ta para den e contract pa promove deporte y actividad deportivo local. Pero di otro banda e ta haya cu Fundacion Lotto pa Deporte no ta haciendo nada pa Canadian Bank Note Company cumpli cu nan contract y pa nan paga e debe cu nan tin.

Den e caso aki e instancia mester paga 2 miyon florin cu nan ta debe pa asina sigui yuda e sector deportivo. Pero tambe pa nos atletanan por participa na eventonan internacional y tambe pa nan por haci inversion den infrastructura deportivo. Entre nan e dos stadion cu a wordo afgekeurd pa FIFA y CONCACAF, cu ta haci cu Aruba no por hunga den su propio pais.

El a bisa cu pais Aruba tin cu paga mas cu 40 mil florin pa bay hunga weganan internacional na Corsou. E mandatario ta cualifica e situacion aki como un berguensa y un caso hopi lamentabel. Vooral si nos tin un compania manera Canadian Bank Note cu ‘a strica asina hopi placa’ e ultimo añanan aki, el a laga sa.

Pero awor cu mundo henter ta confronta e pandemia di Covid, Canadian Bank Note Company ta abstene di cumpli cabalmente cu e contract, cu e argumento cu nan a perde placa.

Nan no kier cumpli cu e 4 miyon florin di e aña aki, sino cu e aña aki nan ta bay paga solamente 2 miyon. E ta lamenta cu un compania asina grandi y respeta, cu mester tin tur e reservanan di mundo pa cumpli cu e contract cu nan a bay di acuerdo cune, awor ta resulta cu nan no kier cumpli. Segun e mandatario, esaki ta un di e discusion cu su ministerio tin cu e Fundacion Lotto pa Deporte, ya cu nan tin e contract cu Canadian Bank Note, pero nan no ta presiona pa nan paga y cumpli cu nan compromiso.

Debe di Canadian Bank Note

Ta asina cu desde aña 2017 e entidad aki mester duna 4 miyon florin pa aña pa Stichting Sportsubsidie Aruba. Pero e tres ultimo aña aki nan mester traspasa 4.5 miyon cada aña. Pero actualmente nan tin un debe di 2 miyon florin.

Pero e aña aki Canadian Bank Note Company a bin cu e argumento cu debi na e situacion di Covid cu a causa cu nan benta a bay atras, y cu nan no a produci entradanan manera nan a presupuesta, nan no por cumpli. Awor nan no kier honra e contract y esaki tin e mandatario di Deporte rabia.

“Ora cos ta bon. Ora nan ta bende entre 50, 60, 70 miyon florin na lotto, e ora si nan kier paga solamente 4 miyon florin,” el a declara. Nan no ta paga mas pasobra eynan nan ta bisa cu un contract nan tin. Pero den temporada di menos benta awor Canadian Bank no kier cumpli cu e contract.

Segun minister Oduber, Canadian Bank Note Company tin cu traspasa e fondonan pa Fundacion Lotto Pa Deporte cu na su turno tin cu pasa e placa aki pa Stichting Sportsubsidie Aruba, ta debe pais Aruba 2 miyon florin. E ta haya cu si berdad nan kier contribui na deporte manera nan ta propaganda, nan mester “pone accion na nan bunita palabranan,” el a bisa.

Den e caso aki Lotto pa Deporte ta esun cu mester reclama y exigi Canadian Bank Note mas placa pa deporte. Mientras cu e ta mira cu durante 3 aña largo, directivanan di Lotto pa Deporte ta come y bebe cu e fondonan destina pa deporte. Pero nan no ta lucha pa e sector aki por haya mas fondo pa inverti den deporte.

Minister Oduber ta spera cu Canadian Bank Note Company tin e disponibilidad pa sinta na mesa cu gobierno pa negosha y duna nos pais loke nos tin derecho dje cu ta e 2 miyon cu nan ta debe na pais Aruba. Pues e ta haya cu na final di dia e compania aki tin un debe cu pais Aruba pa asina e deportistanan y federacion deportivo por haci bon uso di e placa aki.