Ayera informalmente riba su pagina di Facebook, minister di Salubridad Publico, Dangui Oduber a confirma cu a acepta retiro di director di Hospital Dr. Horacio E. Oduber, Ezzard Cillie.
Varios luna atras, Oduber a expresa mal contento cu e directiva di e hospital, esaki en relacion cu varios problema serio cu a tuma luga na hospital durante ultimo lunanan. Esakinan ta inclui supuesto fraude cu pap test, problema cu construccion, falta di personal, y atake cibernetico, entre otro. Segun relatonan den medionan local, Oduber a pidi Conseho di Supervision pa retiro di Cillie for di juni ultimo, pero esaki no a tuma luga mesora.
Ademas, manera Bon Dia Aruba a reporta den nos edicion dia 20 di december ultimo, Oduber a anuncia cu Gobierno no tabata contento cu e funcionamento di Conseho di Supervision, y a pidi su retiro. For di luna di april, Asociacion di Specialistanan di Aruba a manda un otro carta cu por considera como un mocion di desconfiansa den maneho di hospital cu Conseho di Supervision, cu ta esunnan cu mester controla e Hunta Directiva, y esey no a sosode.
Oduber ta sigura cu despues di retiro di Cillie por cuminsa mira algun cambio positivo den hospital, cu ta spera lo ta inicio di hopi cambio significativo cu lo mehora calidad di cuido medico den hospital.
