Minister Dangui Oduber: ‘Strategia mas agresivo pa haci test ta dunando un miho resultado’

Awe atardi, minister di Salubridad, Deporte y Turismo a ofrece un conferencia di prensa pa comunidad y a relata tocante strategianan mas estricto cu ta aplicando awor tocante testnan. Tambe a papia di e posibel creacion di un aplicacion di telefon cu por yuda controla esunnan cu ta isola of den cuarentena.

Oduber a trece dilanti e strategianan cu ministerio di Salud ta hibando y di esaki el a señala cu strategia a bira mas agresivo cu e implementacion di mas test pa asina identifica e casonan positivo y isola nan si nan ta haya e virus.

P’esey el a bisa cu ta importante pa haci testnan pa persona, pa motibo cu tin caso cu e persona ta afecta pero e mes no sa cu ta portador di e virus y e ta sigui move den comunidad, cu e riesgo cu e ta contagia y plama e virus den un forma incontrolabel.

Di mesun manera, Oduber a comenta cu nan ta pone hopi enfasis riba contact tracing, riba esunnan cu ta test positivo y tambe pa esunnan cu ta den cuarentena. Esaki ‘ta hopi importante pa nos por monitor esunnan cu tabatin contacto cu e persona afecta, pa nos por tin un miho control y pone nan den cuarentena’.

Asina mes, el a informa cu na e momentonan aki Aruba ta conta cu un di e miho test den henter mundo y paisnan como Sur Korea y Taiwan, cu tin e situacion bou control, ta usando e mesun strategia aki. Aruba ta aplica e strategia aki, di haci test di manera mas agresivo y te na e momento Oduber a expresa cu nan tin e situacion bou control.

Te fecha di awe 1 di april tin e mesun cantidad di casonan positivo cu ta 55, di cual 4 di nan ta den hospital, 1 den ICU y e 3 otro ta stabiel. E resto di nan ta personanan cu ta isola na cas y den un bon estado di salud, Oduber a sigura.

“Esaki, no ta nifica cu nos a gana e guera ainda, pasobra nos ta depende di e comportamento di e comunidad”, Oduber a remarca.

Tambe, el a bisa cu ta hopi importante den strategia cu nan ta implementa e personanan cu ta den cuarentena, di esaki el a menciona cu hunto cu e Task Force crea pa controla e personanan aki, a bay haci bishita pa asina e personanan den cuarentena cu mester keda den cas lo tin cu cumpli cu esaki. Si nan no ta cumpli cu e medida nan ta haya un boet.

Ademas, el a sigura cu nan ta den plannan pa crea un aplicacion pa asina haci uso di innovacion y tecnologia den e momentonan aki. Via telefon di esunnan cu ta den isolacion y cuarentena nan ta bay controla e personanan di un manera digital pa asina tin un control y un bista miho di con e virus aki ta desaroyando den comunidad y con e ta wordo plama.

Di esaki, el declara cu por medio di Tele Health y Tele Medicine di un manera virtual e dokternan of profesionalnan di DVG por comunica cu e persona na cas y nan por wak den cua estado di salud nan ta.