Durante ultimo seis decada, turismo a experimenta un expansion y diversificacion continuo. Tambe a converti den un sector economico mas importante y cu hopi crecemento na nivel mundial, pa beneficia destino y comunidadnan rond di mundo.

Dia di ayera, Aruba a celebra Dia Mundial di Turismo den un conferencia na Rennaisance Convention Center, cu presentacion di algun invitadonan y tambe minister di Turismo Dangui Oduber y Ronnella Tjin Asjoe-Croes, CEO di Aruba Tourism Authority.

Tjin Asjoe-Croes a papia tocante e celebracion di Dia Mundial di Turismo, expresando cu Aruba ta asina dependiente di dje cu 98% di GDP di e isla ta depende di turismo. Esaki ta un momento pa celebra y ta orguyoso di e resultadonan di ultimo añanan, pero tambe pa reflexiona riba loke ta trata un desaroyo duradero den industria principal manera turismo.

El a indica cu di parti di Oficina di Turismo, nan tin diferente documento y investigacion cu a wordo haci caba y cu ta brinda e contesta di con Aruba por sigui desaroya di un manera duradero. Pa logra esey, Tjin Asjoe-Croes a bisa cu nan a traha un plan cu ta yama ‘Cu Mira pa Futuro’ y tambe nan a desaroya un Niche Route Map, ehemplo di documentonan clave cu tin tur e contesta di kico mester haci y asina tambe con lo atende cu retonan cu industria di turismo global ta enfrenta awendia.

Tjin Asjoe-Croes a expresa cu “Evolucion di Turismo Mundial tambe ta trece hopi reto”, cu por mira na Aruba tambe, pero na otro parti di mundo nan a yega den un fase hopi mas grave.

Tocante turismo na Aruba den aña aki, el a destaca 2019 por cera cu incremento di entre 4% y 6% di entrada pa medio di turismo, compara cu aña pasa cu a cera cu 8%. Pa loke ta trata entrada pa medio di cambernan na hotel, el a bisa cu esey por cera cu un crecemento entre 5% pa 6% y e cantidad di bishitantenan por cera cu 3,6% di incremento compara cu aña 2018.

Tjin Asjoe-Croes a finalisa bisando cu turismo ta hopi dinamico, pero ta hopi fragil tambe. Asina mes a resalta cu Oficina di Turismo ta e bos di e turismo, pero no ta un trabou di nan so, e mester ta un esfuerso colectivo. “Turismo ta algo di cada un persona cu ta biba aki na Aruba” y esey ta hopi importante pa tene cuenta cune.

Di su parti, e parlamentario Setty Christiaans-Yarzagaray, kende tambe tabata presente den e conferencia, a duna danki na tur cu ta traha den industria aki, cu ta duna aporte pa economia y cu e pais por disfruta y biba di dje. Pero tambe a expresa cu tin cu conserva mirando e hecho cu e mundo henter ta mira e parti di sostenibilidad.

Di loke ta trata campaña di conscientisacion di medio ambiente pa Aruba, Christiaans-Yarzagaray a bisa cu mester tin varios programa pa mira kico hende por aporta, entre nan e campana #MyPromise cu ATA a cuminsa recientemente. Esaki ta mustra cu no ta trata di medio ambiente so, sino tambe di henter pais.

Minister di Turismo, Dangui Oduber a sigura cu esaki tabata un dia hopi importante pa comunidad, pa motibo cu diferente investigacion cu a haci door di Central Bureau Statistic World Turism and Travel ta afirma cu 98% di entrada ta bin for di turismo y ta contribui na GDP.

Di mesun manera, Oduber a splica cu directamente turismo ta crea casi 17.000 cupo di trabou na Aruba. E tema di e Dia Mundial di Turismo di e aña aki ta referi pa ‘empleo’, cu semper ta importante na momento cu tin desaroyo pa crea empleo pa e mesun comunidad y teniendo na cuenta cu e sostenibilidad di turismo, un desaroyo sostenibel pa asina mantene e pais competitivo.

Ademas, Oduber a indica cu e cantidad di bishitante di crucero a crece, Revenue per Available Room (RevPAR) tambe a aumenta cu un grado di ocupacion cu tabata entre esun mas halto di henter Caribe na e momentonan aki cu un 90%, loke ta nifica cu 9 di 10 camber ta ocupa y Aruba ta keda como un di e islanan mas atractivo di Caribe.

Pa finalisa, Oduber a destaca cu ‘ta bon pa nos tur reflexiona riba importancia di turismo pa nos pais’.