Otro caso relaciona cu Horacio Oduber Hospitaal (HOH) ta wordo denuncia den prensa. E biaha aki, e no tin cu haci cu e construccion y expansion di hospital, sino cu e laboratorio di hospital mes.
A denuncia cu casa di e Director di Laboratorio di hospital a crea un propio compania di laboratorio, y a registra esaki riba su propio adres di cas na Hulanda, cual ta un domicilio of residencia.
E compania –segun e corant Amigoe – ta CR Lab Services na Delft. E trabou di e compania aki ta cu e ta haya testnan for di laboratorio di hospital, pa despues e manda esakinan door na otro laboratorio na Hulanda. Despues e resultado ta wordo manda Aruba.
E compania aki a funciona manera un trampolin, unda tin conflicto di interes y e servicionan aki no a bay gratis. Segun Amigoe, aki ta trata di PAP-test. Pero no tin claridad si e test a wordo haci na Hulanda of na Aruba mes.
Bon Dia Aruba a tuma contacto cu Minister di Salubridad Publico, Dangui Oduber, kende a bisa cu a tuma nota di e articulo publica den columna di sr. Van der Zee den e corant Amigoe. Na mes momento a tuma contact cu e ‘kroonleden’ di gobierno den e hunta di supervision di hospital. Mientrastanto su ministerio ta den contacto cu e otro miembronan tambe.
E mandatario ta haya cu esaki ta un acusacion hopi serio cu ta ser haci, y como minister encarga cu salud e ta tuma esaki tambe na serio y ta maneha esaki cu cautela. E ta un acusacion di fraude y segun e articulo, ta duna informacion tambe con e fraude lo ta tumando luga.
El a referi cu ta wordo papia di testnan delicado, cu ta wordo haci pa salud di hende, y cu esaki no tin espacio pa haci fraude y tipo di cosnan cu ta wordo insinua. Como Minister di Salud, loke a wordo treci dilanti ta algo cu ta nobo pe, den sentido nunca el a wordo informa di posibel caso di fraude aki na laboratorio di hospital door di ni e hunta di supervision di hospital ni door di e Hunta Directiva di hospital.
“Obviamente si mi tabata na altura lo a tuma e accionnan necesario,” segun e mandatario. Den e caso specifico aki –segun e mandatario– lo dirigi un carta na e hunta di supervision di hospital pa laga un partido independiente haci un investigacion forensico inmediatamente.
A base di e resultado di e investigacion forensico lo determina si mester entrega un keho pa un investigacion penal na Ministerio Publico (OM), pa asina esunnan responsabel di e posibel fraude wordo persigui. Ministerio Publico lo wordo poni na altura tambe, el a informa na Bon Dia Aruba.
Tambe e mandatario ta exigi un contesta di parti gerencia di hospital y tambe claridad y transparencia den e caso aki! E situacion cu a surgi lo mester tin consecuencianan hopi serio –segun e mandatario– si resulta cu loke ta ser publica den prensa por wordo prueba!
