Diamars atardi Minister di Turismo y Salud Publico a presenta e proyecto di Port City na tur e instancianan financiero di Aruba. Minister President sra. Evelyne Wever-Croes tambe tabata presente conhuntamente cu demas coleganan Ministernan Xiomara Maduro y Endy Croes. E proyecto di Port City ta bay enfoka riba mehoracion di e producto turistico general di Aruba, specialmente nos turismo crucero. Creando asina un experencia nobo pa nos bishitantenan como tambe nos localnan.
E vision di e poyecto ta pa desaroya un mixto di actividadnan comercial pa sirbi e tendencia di turismo global obhetivamente, pa trece e turistanan afluente cu tin e deseo pa haya un experencia local y unico como e obheto principal.
Importante pa mencioa ta e hecho cu a tene cuenta den un bon balansa desaroyo den e proyecto aki. Den henter e area disponibel gran mayoria ta bai ta areanan publico, parke di recreacion, boardwalk, scenic road y espacionan habri pa uso di publico.
E magno proyecto aki ta bay wordo financia uzando nos propio instancianan financiero y ta bira un inversion di sector priva di $500 miyon. Minister Oduber a presenta e proyecto aki como un oportunidad unico den bida pa haci inversion. Portcity ta e proyecto mas grandi den historia di pais Aruba.
E mandatario a splica e modelo cu APA lo bay uza caminda APA lo ofrece e terenonan aki por medio di ondererfpacht. E desaroyodador cu gana e destaho publico lo mester paga 40% di e erfpacht di manera delanta y e resto di 60% durante un periodo di 60 aña. Entradanan cu lo wordo genera, APA lo inverti bek den infrastructura, caretera, landscaping, boardwalk y mantencion di esaki. Minister Oduber a señala cu e proyecto di Port City a keda integra den e estudio di “Carrying Capacity”. Tur e desaroyonan na caminda lo bay cumpli cu tur regla y segun nos leynan di e ROPV.
Port City un magno proyecto cu tin hopi potencial, e lo rekeri un inversion priva di $500 miyon dollar cu lo crea un spinoff economico hopi grandi pa nos pais. Tambe e lo crea hopi cuponan di trabou door di uza nos mesun contratistanan, e lo genera entrada pa APA, Gobierno y contribui grandemente na nos GDP. Un bunita proyecto cu lo bay trece mehoracion den e calidad di bida di nos cuidadanonan.
Minister Oduber a compromete pa atraves di e proyecto di Port City sigui duna tur sosten na nos industria turistico y lo continua na crea ambientenan caminda ta fomenta cresemento economico y exitonan continuo pa henter nos comunidad.
E proceso lo bira uno habri, transparente y cumpliendo cu e reglanan di corporate good governance.
Finalmente Minister Dangui Oduber a gradici henter e ekipo di Aruba Ports Authority N.V. kendenan a traha incansablemente den e proyecto aki, colaborando cu Port of Amsterdam International y partnernan clave manera Departamento di Asuntonan Economico y Departamento di Ifrastructura pa haci e proyecto aki posibel.
