Minister di Turismo Sr. Dangui Oduber a reuni cu tur e stakeholdernan den cuadro di e plan nacional di NCD’s (non-communicable diseases). Den e reunion aki e mandatario a mustra e stakeholdernan riba e vision y maneho cu e Ministerio di Salud Publico lo kier hiba den e proximo 4 añanan di gobernacion. E stakeholdernan aki lo bay fungi como e stuurgroep cu lo mester bay brainstorm riba e parti di prevencion. Esaki ta e nucleo di con lo bay combati tur e malesanan NCD’s, cu a largo plaso lo yuda na baha e gastonan di AZV.

NCD’s ta encera malesanan manera cancer, diabetes, cardiovascular, stroke y respiracion cronico. Tur e malesanan aki ta pisa hopi riba e gastonan di AZV, por ehempel diabetes ta ocaciona cu bo riñon nan ta stop di funciona optimal y conscuentemente bo lo mester dialysa. Un pashent cu ta dialysa tin un costo di 100 mil florin anual pa AZV y tur e malesanan aki por a wordo preveni.

Minister Oduber ta kere firmemente cu e parti preventivo ta e solucion pa tin un fondo di AZV mas sostenibel. Un ehempel di esaki ta ora bo bay bo dokter di cas embes e dunabo medicamento, e por dunabo tipsnan di kiko pa come y consehabo pa haci ehercisio. Di e manera aki e systema di cuido medico lo bay gasta menos den medicamento. Den cuadro di esaki Minister Oduber ta bay bin cu un clinica di obesitas cu lo ta situa na Hospital mes. Minister Oduber ta haciendo su maximo esfuerso pa logra habri e clinica aki pa december di e aña aki. Na e clinica aki personanan cu ta obeso lo haya un guia profesional pa yega na hiba un bida mas saludabel y preveni asina tur e malesanan NCD’s cu obesidad por trece cune.

Aruba ta e prome y unico isla den Caribe cu tin un plan nacional di prevencion di NCD’s y pa esaki Minister Dangui Oduber y Gobierno di Aruba a wordo elogia door di PAHO. Danki na e reconocimento aki, PAHO a duna Gobierno di Aruba fondo pa wordo uza na tres proyecto.

Minister Dangui Oduber tin confiansa cu e stuurgroep lo bin cu ideanan creativo pa por yega na un plan concreto y integral cu por wordo uza pa prevencion.  E plan aki mester bira un plan cu lo mester wordo incorpora den nos comunidad, pa haci nos comunidad mas consciente pa cu nan salud. Minister ta na altura cu pa cambia un cultura di un pais no ta facil, pero un cos ta sigur nos no por keda man crusa.