Diamars mainta Minister di Turismo y Salud Publico, Sr. Dangui Oduber a contesta preguntanan y presenta datonan di CBS di e cantidad di persona cu a fayece na Aruba e ultimo añanan.
Recientemente Minister Oduber a ricibi algun pregunta di miembronan di fraccion di AVP Sr. Mike Eman y Sra. Merwin Wyatt-Ras, y ayera, den un comunicado di prensa, “Minister Dangui ta contradeci tur e ponencianan infunda y incorecto haci pa e miembronan di fraccion di AVP.”
Si nos tuma nota di estadisticanan di e cantidad di persona cu a fayece e ultimo añanan, nos por conclui cu hustamente tin un bahada di e cantidad di persona cu a fayece. Oduber ta lamenta cu Sr. Eman y Sra. Wyatt-Ras ta mal informa comunidad y crea panico innecesario siendo cu e cifranan mes ta contradeci nan ponencianan, segun e comunicado.
Estadisticanan di CBS ta demostra cu e Cantidad di persona cu a fayece e ultimo añanan ta como lo siguiente:
Aña 2021: 964
Aña 2022: 879
Aña 2023: ta proyecta 800 (te cu di 3 kwartaal di 2023 – 611 persona a fayece)
Un otro ponencia cu Oduber a contradeci ta cu segun fraccion di AVP, e gobierno aki lo ta cortando den cuido medico. Hustamente e aña aki, esta aña 2024, ta invertiendo 13.5 miyon florin extra den mehoracion di calidad di cuido y servicio. E 13.5 miyon florin cu a inverti den cuido medico a wordo reparti como lo siguente:
5.1 miyon florin extra pa Hospital;
4.1 miyon extra pa ImSan;
1.8 miyon pa Stichting BOB haci bevolkingsonderzoeken pa early detection di cancer di pecho;
1 miyon pa respaldo pa asina tuma mas profesionalnan;
1.5 miyon pa reenforsa e prome liña di cuido y tambe pa digitalisacion di cuido medico.
Minister Dangui Oduber a contesta tur e preguntanan cual e lo bay entrega na e miembronan di fraccion di AVP. Minister Dangui Oduber ta pone e preguntanan y e contestanan aki pa comunidad por lesa, pa asina na un forma habri y transparente informa comunidad di Aruba debidamente, segun e comunicado ta finalisa.
