Diaranson anochi Minister di Deporte Sr. Dangui Oduber a bishita Centro Di Bario Savaneta pa mira personalmente con e proyecto a keda. Centro di Bario Savaneta pa basta aña tabata den mal estado, dirigentenan no tabata haya oido di gobierno anterior. E gobierno aki si a duna atencion na e problema y percura pa e cancha keda completamente restaura.
Den e proyecto aki a percura pa pinta ful e edificio, a drecha tur e hek werk rond y e back stop di e cancha. Tambe a traha un porta di hero nobo, remodela e parti tribunal y pone lusnan LED nobo pa asina por haci sport parti anochi tambe.
Deporte ta un instrument importante pa nos pais. E ta percura pa entre otro un bida mas saludabel, tanto fisico y mental, e ta tene hobennan leu di delincuencia y ta siña nan disciplina. Sin deporte, un nacion no tin bida. Pa e motibo aki, Minister Dangui Oduber ta haya importante pa deporte na Aruba haya e atencion debido.
Minister Dangui Oduber ta sigui cumpli apesar cu e fondonan pa deporte ta hopi limita, asina mes a haci hopi pa deporte. E mandatario a menciona cu a yuda diferente clubnan cu material, airco, iluminacion y hopi mas. Intencion ta pa poco poco drecha den tur barrio caminda tin necesidad pa cu deporte.
Minister Oduber kier a gradici e dirigentenan di Centro di Bario Savaneta pa tur locual nan a haci pa promove deporte y actividad fisico na Aruba y ta desea nan exito pa den futuro. Cu esaki minister Oduber ta ehecutando su maneho no obstante e retonan cu tin cu Fundacion Lotto Pa Deporte pa yuda mehora infrastructura pa stimuli participacion den deporte.
