Ayera dialuna den un reunion publico Parlamento di Aruba a trata e presupuesto supletorio di ministerionan pa aña 2023. Manera custumber ministernan a contesta pregunta di e parlamentarionan y durante e prome tanda Minister di Salud Publico y Turismo, Dangui Oduber, a elabora ariba diferente topico cu parlamentarionan a trece pa dilanti.

Un presupuesto supletorio ta ora durante aña gobierno ta ripara cu e presupuesto cu Parlamento a aproba na comienso di aña ta cambia. Den e reunion publico cada minister ta splica pakiconan mester fondonan extra pa nan ministerio, pero cu e condicion cu esaki no ta bay bira un gasto adicional pa gobierno.

Minister di Salud Publico y Turismo, Dangui Oduber, a ricibi varios pregunta di diferente miembro di diferente fraccion pa loke ta trata su ministerio.

Parlamentario Aquannette Gunn miembro di fraccion di partido MAS a haci pregunta referente entradanan adicional di AZV. Minister Oduber a splica cu e entradanan adicionl aki ta bini danki na e crecemento di turismo cu ta traduci su mes den un crecemento economico cu na su turno ta traduci su mes den un aumento den entrada den e primanan di BAZV y tambe e primanan di AZV.

“Esaki ta pone cu ya caba nos ta premira cu AZV lo termina aña riba un nota positivo pa cuido pasobra tur e surplus ta wordo inverti back den cuido medico. Ya caba nos a prepara un plan di inversion pa asina tur e surplus bay back directamente den cuido medico,” el a indica.

Miembro di fraccion di partido MEP, parlamentario Arthur Vallejo, a expresa su preocupacion pa yiunan di tera cu segun e parlamentario a indica den su pregunta, no ta wordo reconoci. Minister Oduber a remarca cu a introduci AruBIG netamente pa brinda oportunidad na e yiunan di tera cu ta studia den e region.

El a señala cu anteriormente prome cu Gabinete Wever-Croes a drenta gobierno na 2017, e grupo aki a wordo priminti pa hopi aña cu lo wordo reconoci, pero niun gobierno ni Minister di Salud no a percura pa introduci un AruBIG pa reconoce nan pa asina nan por traha na Aruba.

El a sigui splica cu sr. Vallejo a indica tambe cu Ministerio di Salud no tin interes pa traha cu Universidad Del Bosque, na Colombia, locual e minister a resalta ta incorecto.

El a elabora cu Ministerio di Salud a tene reunion cu del Bosque ora cu recientemente e tabata na Colombia formando parti di e delegacion di Minister di Economia y durante nan estadia nan a tene combersacion cu Del Bosque pa asina evalua con por yega na un acuerdo di coopreacion pa intercambia specialistanan pa yuda den e estudio di dokter di cas miranod e escasez grandi di dokternan di cas.

El a indica cu e universidad a palabra cu nan lo bishita Aruba den luna di augustus cu nan delegacion, pero esaki no tuma luga ainda y ta wardando ariba esaki pa asina por continua cu e siguiente pasonan pa crea un cooperacion.

Parlamentario Vallejo a puntra tambetocante e 8 miyon florin extra cu tabatin den AZV na aña 2022 y unda esaki a bay. Minister Oduber a splica cu esaki a bay den mitigacion di e listanan di espera di diferente specialismo. A contrata mas urologo, mas retinologo, a percura pa expande e camber di endoscopia na hospital, a expande radiologia cu mas asistente y a percura tambe pa psiciatranan extra den servicio.

El a agrega cu ImSan tambe a haci peticion pa un suma adicional pa haci diferente inversion pa mehoracion den calidad di cuido, a percura pa aloca fondo pa compra di ambulance nobo y tambe a financia 16 stoel nobo di dialyse.

Parlamentario di fraccion di RAIZ Misha Raymond a puntra tocante inlcusion di kinder fysiotherapeut den e presupuesto structural y kico ta e palabracionnan pa loke ta trata e recorte di 60 miyon den cuido cu Hulanda ta exigi.

Den su contesta e mandatario a remarca cu recientmente a trece tur e sector di cuido hunto y pa prome biaha den historia a firma un acuerdo di cuido cu ta basa riba un ‘meerjarig financieel kader’ (marco financiero plurianual). El a sigui splica cu pa tene cuenta cu esaki y conhuntamente cu e acuerdo di cuido, a determina kico ta e prioridadnan pa cuido medico siguiendo pa dilanti, a identifica kico ta e areanan cu mester di mas atencion y haci palabracionnan concreto

Tocante e recorte di 60 miyon florin den cuido medico, el a naftisa cu na mas di un ocasion Gobierno di Aruba a expresa cu nunca nan tabata di acuerdo cu esaki. El indica cu desde cu Hulanda a impone e recorte aki, gobierno a abisa cu e tabata algo irrealistico y cu no lo por bay cumplin cune.

No obstante el a enfatisa cu nan ta di acuerdo cu mester haci cierto reformanan pa garantisa cu e fondo ta keda manehable y sostenible pa asina por sigui ofrece e mesun pakete amplio cu AZV ta ofrece na su aseguradonan.

“E tabata un tarea hopi dificil pa haci e reformanan, no tabata algo facil y pio den un pandemia di salud pa bay haci recorte den cuido medico. Finalmente nos a yega asina leu pa convence CaFT pa stap over di enbes di keda pone presion pa reduci e gastonan structuralmente cu 60 miyon pa aña, pa nos por entrega un meerjarig financieel kader cu nos ta bay tene nos mes na un budget di presupuesto mara na 450 miyon florin pa aña y den e cuadro aki ta loke nos tin pa traha cune,” Minister Oduber a splica.

El a agrega cu a entrega esaki caba na CaFT y cu e ta “sinti” cu loke gobierno a haci y a bin ta haciendo ta garantisa cu e fondo ta keda manahable y cu e fondo di AZV ta keda sostenible. Segun el a sigui bisa nanta convenciendo Hulanda pa hala atras di e presion di reduci e gastonan cu 60 miyon si nan pasa over na e reformanan cu ya caba nan a bin ta introduciendo.

Parlamentario di fraccio di AVP, sra. Mervin Wyatt-Ras a puntra tocante privacidad pa loke ta trata e Health App cu recientemente a wordo anuncia pa Minister Oduber.

E mandatario a enfatisa cu e desaroyo aki lo beneficia e sector di cuido pa asina hacie mas eficiente pa e pashentnan na momento di pidi cita y di tin e informacion necesario na nan disponibilidad.

El a remarca cu naturalmente ta bay tene cuenta cu privacidad, ta tene cuenta cu e rijkswet na caminda y ta tene cuenta tambe cu e preocupacionnan cu tin pasobra tin informacion delicado cu mester wordo poni riba e health app y pa e motibo ey tambe a haci escogencia pa traha cu e compania estatal Setar.