Diasabra ya ta marca un aña caba cu Aruba a conoce su prome 2 casonan di COVID-19, Aruba a bira parti di e pandemia mundial y nos bida a cambia. Esaki tawata e aña mas duro den historia di pais Aruba. Un aña dificil, cu hopi stress la nos tur, cu hopi tension y intercidumbre. Nos tur a sinti e efectonan y Covid-19 a causa hopi destruccion den tur sentido di palabra. P’esey Gobierno lo conmemora e fecha di 13 di maart 2021 pa trece un reflexion riba tur locual pais Aruba a pasa aden, asina Minister di Turismo, Salubridad Publico y Deporte Sr. Dangui Oduber a trece dilanti.

Minister Dangui Oduber tabata tin un rol hopi importante durante e pandemia mirando e carteranan di Turismo y Salubridad cu tabata esunnan cu a wordo afecta directamente door di e pandemia. E mandatario conhuntamente cu ful e Crisis Team, conseho di minister y bou liderazgo di Minister-President a haci tur locual tawata den nan alcance pa cuida y proteha e comunidad di Aruba.

Pa prome biaha den historia, Aruba a conoce un toque de queda, shelter in place y un lockdown na nos frontera. Tabata decisionnan dificil pa tuma, pero mester a pone bida di hende prome sabiendo cu esaki ta bin a cambio di nos economia. Gobierno semper a haci su maximo esfuerso pa trece e balansa entre salubridad y economia. Hopi tabata esunnan cu a perde nan trabou debi na e pandemia y ta esunnan cu a perde nan sernan keri debi na Covid-19.

Gratitud

Minister Oduber kier a gradici di curason tur esunnan cu ta traha den cuido. Danki na boso esfuerso y compromiso pa brinda un excelente cuido y servicio na patentnan. Danki na tur frontliners cu tawata na trabou percurando pa Aruba por keda draai. Danki na coleganan di ministerio TVS, mi coleganan minister, miembronan di crisis team, departamento di salud publico (DBZ- team brond- contacten onderzoek, team isolatie en quaraintaine- taskforce bedrijven- team vacuna) y specialmente na comunidad pa e comprension y disciplina demostra den e 1 aña aki.

Nos ta gradicido na bosonan tur. Aruba a demostra union durante e pandemia pa combati esaki.

Intensive Care Unit (ICU)

Prome cu e pandemia HOH tabata tin solamente 11 unidad di cuido intensivo, Minister Oduber a percura pa aumenta e capacidad cu 22 unidad di cuido intensivo. Actualmente HOH tin 33 unidad di cuido intensivo cada un cu nan mesun ventilando. Tambe e mandatario a percura pa aumenta e personal di cuido cu 108 personal extra di AMI. Na ningun momento HOH a yega na nan maximo capacidad di e ICU y semper por a duna e miho cuido na e pashentnan. Den un aña di COVID-19 un total di 457 pashent a keda hospitalisa y lamentablemente e virus a cobra bida di 77 persona. Sigur esaki tawata esun mas doloroso pa nos tur.

Aruba Health App

Nos obstante tur e retonan nos a pensa con nos por percura pa por recupera nos turismo den medio di un pandemia.

For di dia cu Aruba a habri su fronteranan na juli 2020 Aruba a lansa e Aruba Health App. Cu e app aki turistanan y localnan cu ta yega Aruba ta download e app y ta haya tur informacion di nan PCR test dentro di 6 ora den manera digital. Aruba a wordo reconoci mundialmente pa nos protocolnan, nos innovacion y sigur e Aruba Health App. Awor por uza e mesun app aki pa registra pa haya bo vacuna. Minister Oduber ta satisfecho cu atrobe Aruba ta frontrunner y pionero pa innovacion.

Aruba Health & Happiness Code

ATA a prepara e Aruba Health and Happiness Code, a percura pa certificacion tur e establecimentonan caminda nan ta demostra na e turista cu nan establecimento ta cumpli cu tur rekisitonan di COVID-19, manera un bon higiena y proteccion. Esaki a sirbi como un punto importante di mercadeo cu a mustra e turista cu Aruba ta un destinacion sigur pa cu COVID-19.

Vacuna

Aruba ta un di e paisnan fortuna na mundo cu tin acceso na e vacuna contra COVID-19 como nos ta parti di Reino. Recientemente e di dos lote di vacunanan a yega Aruba, te cu awor Aruba a ricibi 24.570 vacuna for di Hulanda. Tin mas di 30 mil persona cu a registra pa haya e vacuna di cual 11 mil hende a haya e vacuna caba. Minister Oduber ta haci un yamada na comunidad pa sigui registra pa participa den e campaña nacional di vacunacion.

Minister Dangui Oduber ta gradici comunidad di Aruba pa nan pa nan pasenshi y disciplina durante 1 aña hopi dificil. Hunto nos lo logra vence e pandemia aki. Ban sigui vacuna Aruba, ban sigui salba bida y ban prospera.

Finalmente minister Oduber a bisa cu Covid-19 a pone nos tur para keto y reflexiona con nos mester balora tur loke nos tin riba e pais aki. Nos lo sa di bounce bek, Aruba ta un pais resiliente, fuerte y den union, paz y harmonia nos lo mira bek un futuro briyante pa un y tur cu ta biba riba e pais aki.