Minister Dangui Oduber na inauguracion di Fact Team: ‘Porfin tin ayudo pa e hoben cu ta sufriendo di adiccion y problemanan mental’

Ayera na Santa Cruz, specificamente na antiguo edificio di Hulpbestuurskantoor, a tuma luga e lansamento di Fact Team, un proyecto cu gobierno di Aruba hunto cu Social Crisis Plan a financia.

Minister di Salubridad, Dangui Oduber a ofrece un palabra pa e medionan di comunicacion local, personanan presente y ekipo cu lo traha pa Fact Team. El a sigura cu e ultimo lunanan, Ministerionan di Salud y di Asunto Social a busca tur profesional manera psikiatra, psicologo y enfermero y e intencion ta cu Fact Team lo duna e servicio ambulatorio pa mucha y hobennan cu tin problema di adiccion y tambe cu tin problemanan mental.

“E ta un bunita proyecto y ta demostra cu gobierno aki ta duna atencion pa ser humano”, Oduber a destaca.

Di mesun manera, Oduber a splica cu e grupo lo bay ta disponibel 24 ora pa dia cu un meldpunt cu lo wordo atendi cu un ‘Crisis Opvang Center’. Na momento cu famianan tin un persona cu tin problema cu adiccion, sea un mucha of un hoben y tambe personanan cu problemanan mental, comunidad por yama na e number 585-6900 of 522-4343 y e Fact Team ta yega cerca nan pa mira kico ta e situacion y con urgente e ta.

Oduber a specifica cu si e caso no por wordo trata ambulante, e ora ey lo mester referi pa Fundacion pa Maneho di Adiccion Aruba (FMAA) na Sero Colorado of na Respaldo, cu hunto lo haci un esfuerso den e lunanan aki pa set up e Fact Team. Di mesun manera el a comenta cu proximamente lo expande den tur districto di Aruba pa brinda un miho servicio.

“Den nos comunidad tin hopi hoben cu ta sufriendo di adiccion y problemanan mental cu ta creciente y nos tur tin cu atende”, Oduber a sigura.

Di su parti, Rafael Lopez, persona cu ta encarga pa guia y coordina e trabou di Fact Team, tocante esaki a referi cu e grupo aki ta un sistema flexibel pa duna e tratamento den comunidad, esey ta nifica cu e persona no mester keda interna.

Lopez a manifesta cu esaki ta un sistema cu ta implementa na tur parti rond mundo aworaki, pa limita cu un persona ta wordo interna. SPD ta un servicio cu ta existi desde 1971, pero semper tabata pa tratamento pa adulto y aworaki nan a inclui mucha y hoben den e tratamento, cu no tabatin e servicio ambulatorio pa nan.